Aqsý qalasynyń temirjol vokzaly jańartylyp jatyr

PAVLODAR. KAZINFORM - Quny 257,4 mln teńge bolatyn joba oblystyq bıýdjet esebinen iske asyrylýda. Jańarǵan vokzal jyl sońynda jolaýshylardyń ıgiligine tapsyrylýy kerek.

Aqsý qalasynyń temirjol vokzaly zamanǵa saı jańaryp jatyr. Munda perron alańyn abattandyrý, platformany jańǵyrtý, halyqtyń qozǵalysy shekteýli toptary úshin vokzaldy beıimdeý, bólmelerdiń ishki árleý jumystary qarastyrylǵan. Sondaı-aq ǵımarattyń syrtyn qaptap, burynǵydan jyly etý kózdelgen.

Óńirlik jolaýshylar kóligi jáne avtokólik joldary basqarmasynyń dereginshe, barlyq jumystar «Qazaqstan temir joly» ulttyq kompanııasymen kelise otyryp júrgizilýde. Quny 257,4 mln teńge bolatyn joba oblystyq bıýdjetten qarjylandyrylǵan. Jumystardy jyl sońyna deıin aıaqtaý josparlanǵan.

- Aqsý qalasynyń vokzaly 1982 jyly bir qabatty etip salynǵan. Sodan beri kúrdeli jóndeýden kórmegen. Qazirgi ýaqytta munda rekonstrýktsııa jáne jańartý jumystary júrgizilip jatyr.

Jumystardyń shamamen 20 %-y aıaqtaldy. Aldaǵy ýaqytta Qalqaman, Shiderti, Bozshakól jáne Qarasor eldi mekenderindegi shaǵyn vokzaldardy da jańartý kózdelgen, - deıdi basqarma basshysy Qanat Qashkırov.

Eske sala keteıik, qarjy jetkiliksizdigine baılanysty Pavlodar áýejaıyn jóndeý taǵy bir jylǵa uzardy.