Aqsý qalasynda jaıaý júrginshini eki birdeı kólik qaǵyp, mert qyldy

PAVLODAR. KAZINFORM - Polıtsııa qaıǵyly jol-kólik oqıǵasy jáne oqıǵa ornynan jasyryný derekteri boıynsha qylmystyq is qozǵady.

Óńirlik polıtsııa departamentiniń deregi boıynsha, 6 qazan kúni Aqsý qalasynda VAZ-21213 avtokóliginiń júrgizýshisi joldan ótip bara jatqan jaıaý júrginshini qaǵyp ketken.

- Zardap shekken adamdy joldan ótip bara jatqan VAZ-21070 avtokóligi de artynsha janshyp ótken. Júrgizýshi oqıǵa ornynan izin sýytqan. Oqıǵa saldarynan jaıaý júrginshi qaza tapqan. Polıtsııa qyzmetkerleri júrgizýshilerdi anyqtap, ustady jáne polıtsııa bólimine jetkizdi. Jol-kólik oqıǵasy jáne oqıǵa ornynan jasyryný faktileri boıynsha qylmystyq is qozǵaldy, - dep habarlady departtamentten.

Oqıǵanyń mán-jaıy men sebepteri tergeý barysynda anyqtalatyn bolady.

Tártip saqshylary mundaı qaıǵyly oqıǵalardyń aldyn alý úshin jol qozǵalysyna qatysýshylardy jyldamdyq rejımin qatań saqtaýǵa, kólik quraldarynyń tehnıkalyq jaǵdaıyna turaqty túrde baqylaý jasaýǵa shaqyrdy.

Eske sala keteıik, Almatyda jedel járdem kóligi jasóspirimdi qaǵyp ketti.