Aqsý qalasynda muqtaj adamdarǵa qurylysy aıaqtalmaǵan páterler satyp alynǵan

PAVLODAR. KAZINFORM — Aqsý qalasynyń prokýratýrasy áleýmettik osal toptaryna arnalǵan 24 páterdiń turǵyn úıge jaramsyz kúıinde satyp alynǵanyn anyqtady.

Tekserý barysynda Aqsý qalasy qurylys bóliminiń satyp alǵan páterleri sol kezde áli tolyq aıaqtalmaǵany jáne azamattardyń turýyna daıyn bolmaǵany belgili bolǵan.

— Qurylys bóliminiń burynǵy basshysynyń zańsyz áreketteri nátıjesinde memleketke 50 mıllıon teńgeden astam zalal keltirilgen. Aqsý qalasynyń aýdanaralyq soty atalǵan laýazymdy tulǵany qyzmettik ókilettigin asyra paıdalaný arqyly aýyr zardaptarǵa ákelgeni úshin eki jyl merzimge bas bostandyǵynan aıyrý jazasyna kesti, — dep habarlady óńirlik prokýratýradan.

Sot úkimi áli zańdy kúshine engen joq.

Prokýrorlyq qadaǵalaý aktisi boıynsha anyqtalǵan zań buzýshylyqtar joıylyp, kezekte turǵan azamattar kópten kútken turǵyn úımen qamtamasyz etildi.

Eske sala keteıik, prokýratýra balalar ortalyǵy tárbıelenýshisine 1,1 mln teńge alıment óndirip berdi.