Aqsý qalasynda qatty jelden qulaǵan aǵash áıeldi mert qyldy

PAVLODAR. KAZINFORM - Jedel járdem qyzmeti mert bolǵan áıeldiń 1968 jylǵy ekenin habarlady.

Aqsý qalasynda kólikte otyrǵan áıel adamnyń keýdesine qatty jeldiń saldarynan qulaǵan aǵash kirip ketken. Ol alǵan jaraqaty saldarynan oqıǵa ornynda kóz jumǵan.

- Jedel járdemge shaqyrý saǵat 17:29-da tústi. Áıeldiń keýde tusyna qulaǵan aǵash qadalǵan. Oqıǵa ornyna jetken medıtsına qyzmetkerleri 1968 jyly týǵan áıel adamnyń aýyr jaraqattar alǵanyn jáne oqıǵa ornynda kóz jumǵanyn rastady, - dep habarlady óńirlik jedel járdem stansasynan.

Búgin tústen keıin Pavlodar oblysy aýmaǵynda surapyl daýyl júrip ótti. Saldarynan eldi mekenderde aǵashtar qulap, elektr jelileri úzildi. Ǵımarattar men avtokólikterge zaqym kelgeni týraly aqparattar tarap jatyr.

Óńirlik tótenshe jaǵdaılar departmenti jeldiń jyldamdyǵy sekýndyna 28 metrge jetkenin habarlady.

Eske sala keteıik, Ekibastuzda 500 kV elektr jetkizý jelisi apattyq jaǵdaıda ajyratyldy.

Arada kóp ýaqyt ótpesten Ekibastuz energııa torabynyń jumysy qalpyna keltirildi.