Aqsý qalalyq qurylys bóliminiń burynǵy basshysy 2 jylǵa sottaldy

PAVLODAR. KAZINFORM — Ol áleýmettik osal toptaǵy azamattarǵa aıaqtalmaǵan páterlerdi satyp alǵany úshin aıyptalǵan. 

Pavlodar oblysy Aqsý qalasynyń qurylys bóliminiń burynǵy basshysy áleýmettik osal toptaǵy azamattarǵa aıaqtalmaǵan páterlerdi satyp alǵany úshin 2 jylǵa bas bostandyǵynan aıyryldy. 

Óńirlik prokýratýranyń habarlaýynsha, onyń aldyndaǵy basshyǵa jáne merdigerge qatysty kóppáterli turǵyn úı qurylysy kezinde oryndalmaǵan jumystar úshin 451 mln teńge tóleý derekteri boıynsha tergeý júrgizilip jatyr.

— 2025 jylǵy qadaǵalaý qyzmetiniń qorytyndysy boıynsha prokýratýra tarapynan zańsyz memlekettik satyp alýlardy 32 mlrd teńgege joıý, bıýdjet qarajatynyń 24,1 mlrd teńgege negizsiz jumsalýyn boldyrmaý, 3 mlrd teńge kóleminde zalaldy óndirý, 6,5 mlrd teńge somasyndaǵy múlikti qaıtarý, sondaı-aq 1 mlrd teńge aıyppul óndirip alý arqyly memlekettiń materıaldyq múddeleri qorǵaldy, — dep málimdedi oblystyq prokýratýradan.

Tsıfrlandyrý salasynda, onyń ishinde aýyldyq jerlerdi ınternetpen qamtamasyz etý barysynda 150 mln teńge kóleminde jymqyrý derekteri anyqtalǵan.

Bıýdjet qarajatyn jumsaý kezinde oryn alǵan barlyq urlyq pen qyzmettik ókilettikterdi teris paıdalaný derekteri boıynsha sotqa deıingi tergep-tekserý bastaldy.

Kúdiktiler qamaýda, oblys prokýratýrasynyń sotqa deıingi tergep-tekserý basqarmasy tergeý júrgizip jatyr.

Jalpy alǵanda, jaýapkershiliktiń ártúrli túrlerine 160 adam tartylyp, 11 adamǵa qatysty aıyptaý úkimderi shyǵarylǵan.

Eske sala keteıik, QTJ Pavlodar fılıalynyń qyzmetkerleri para alǵany úshin 7 jylǵa sottaldy.