Aqsý irgesindegi aýyl turǵyndary sýsyz qaldy - Pavlodar oblysy
Aýyl turǵyny, zeınetker Marjan Namazbaevanyń sózine qaraǵanda, problema eki apta buryn bastalǵan. - Eki apta shamasynda sýdy qaıta-qaıta bir-eki saǵatqa ashyp-jaýyp otyrdy, - deıdi aýyl turǵyny. – Keshe sýdy múldem óshirip tastady. Endi sýsyz qaldyq. Úkimettiń biraz aqshasy jumsaldy ǵoı. Oǵan qosa, qubyrdy úıge deıin qazyp tartyp alý úshin de aqsha jumsadyq. Qazirgi kezde sýdy mashınalarmen ákeledi. Biraq ol búkil aýyldy sýmen qamtamasyz ete almaıdy ǵoı. Marjan Namazbaevanyń aıtýynsha, 2018 jyly ortalyqtandyrylǵan sý jelisi iske qosylǵan kezde halyq órkenıetke jettik dep qýanǵan bolatyn. Basynda turǵyndar shynynda da úı kranynan aǵatyn sýdyń rahatyn kórgen. Biraq bıylǵy jyldyń kókteminde jaǵdaı nasharlady. Alǵabas aýyldyq okrýgi ákiminiń mindetin atqarýshy Aslan Qasenovtiń aıtýynsha, sýmen qamtý bir táýlikke sóndirildi. Maqsat – sýdyń jumsalý mólsherin anyqtaý. - Keshe saǵat 14:30-da Lenın kentinen sýmen qamtý toqtatyldy, - deıdi Aslan Qasenov. – Bul jerde sýdyń Aınakól aýylyn eseptemegendegi Lenın kentine jetkilikti mólsherin anyqtaý maqsaty kózdeldi. Bilýimshe, «Gorkomhoz» turǵyn úılerdiń jańǵyrtý» JShS sýdy búgin tústen keıin qosady.
Aýyldyq okrýg basshylyǵynyń pikirinshe, Aınakóldi taza aýyz sýmen qamtýdaǵy basty másele – turǵyndardyń sýdy shamadan tys jáne maqsatsyz paıdalanýynda. - Sý óte kóp mólsherde jumsalýda, - deıdi Aslan Qasenov. – Bul birneshe tazalaýdan ótken artezıandyq sý, ıaǵnı taza aýyz sý. Al turǵyndar ony baý-baqsha sýarýǵa paıdalanady. Sol sebepti sý eki aýylǵa birdeı jetpeıdi.
2018 jyldyń sáýir aıynda «Aı-Sý Melıoratsııa» JShS Aqsýǵa qarasty Aınakól men Syntas aýyldarynda sý jelilerin salýǵa kiristi. Sol jyldyń sońynda qurylys jumystary aıaqtaldy. Barlyǵy 216 úıge sý jelileri tartyldy. Jelilerdiń jalpy uzyndyǵy - 17 shaqyrym shamasynda. Sý Lenın kentinen beriledi.
Aıta keteıik, Pavlodardan 11 shaqyrym, Aqsýdan 21 shaqyrym qashyqtyqta ornalasqan Aınakólde shamamen 1000 adam turady.
