«Aqsý» fýtbol klýby Qazaqstan premer-lıgasynda oınaıtyn quramyn tanystyrdy
PAVLODAR. QazAqparat - Aldaǵy fýtbol maýsymyna qatysatyn komandanyń jańarǵan quramynyń tanystyrylymy «Dostyq úıinde» ótti. Kezdesýge klýbtyń oıynshylary men basshylyǵy, óńirlik fýtboldyń ardagerleri qatysty, dep habarlaıdy QazAqparat.
Óziniń quttyqtaý sózinde aımaq basshysy Ábilqaıyr Sqaqov qazirgi kezde Pavlodar oblysynda fýtbolmen shuǵyldanýǵa barlyq qajetti jáne qolaıly jaǵdaı jasalǵanyn atap ótti.
- Bizdiń fýtbolıster «Sport sıtı» aýmaǵynda ornalasqan jańa jabyq manejde jyl boıy jattyǵa alady, - dedi ákim. – Tek ótken jyldyń ózinde bes mekteptiń stadıonynda rekonstrýktsııa júrgizildi. Bıyl biz osy baǵdarlamany jalǵastyrýdy josparlap otyrmyz. Onyń nátıjesinde barlyq tilek bildirýshiler fýtbolmen aınalysa alady dep oılaımyz.
Jergilikti klýb komandaǵa jańadan qosylǵan jartylaı qorǵaýshy Tuńǵyshbaev Erkebulandy jaqsy qabyldady.
Ol - Shymkent fýtbolynyń ókili, al, 2016 jyldan beri elimizdiń ulttyq quramasynyń sapynda óner kórsetedi.
- «Aqsý» klýbynda ulttyq qurama úshin oınaǵan jigitterdi kezdestirdim, - dedi sportshy. – Biz bıik belesterge jetý úshin barlyq kúsh-jigerimizdi jumsaımyz.
Pavlodarlyq fýtboldyń ardageri Sadýov Oırat óńirge iri matchterdiń oralýyna degen qýanyshyn bildirip, oıynshylarǵa sáttilik tiledi.
- Biz joldastyq kezdesý ótkizip, klýb úlken jumys atqarǵanyn sezdik, - dedi ol. – «Aqsý» komandasyna sáttilik tileımin, úıtkeni fýtbolda sáttilik mańyzdy rol atqarady.
«Aqsý» oıynshylary ózderiniń alǵashqy oıynyn 5 naýryz kúni qonaqta «Atyraý» fýtbol klýbymen ótkizedi. Qalamyzdaǵy birinshi match 10 naýryz kúni ortalyq stadıonda ótedi.
Bul kúni «Aqsý» ótken maýsymdaǵy Premer-lıganyń vıtse-chempıondary – «Astana» klýbyn qabyldaıdy.
Foto: Valerıı Býgaev
