Aqsý ferroqorytpa zaýytynda jumysshy qaza tapty

AQSÝ. QazAqparat - Aqsý ferroqorytpa zaýytynda er adam kóz jumdy, dep habarlaıdy QazAqparat.

Oqıǵa 20 jeltoqsan kúni saǵat 08.21-de Aqsý ferroqorytpa zaýytyndaǵy​ balqytý tsehynda bolǵan.

Bul týraly zaýyttyń Instagram paraqshasynda jarııalandy.

Zaýyttyń málimdeýinshe, konveıer jabdyǵyna qyzmet kórsetý kezinde jazataıym oqıǵa bolyp, slesar-jóndeýshi jaraqat alǵan.

«Oqıǵa ornyna dereý jedel járdem shaqyrylyp, zardap shekken adam Aqsý ortalyq aýrýhanasynyń jansaqtaý bólimine jetkizildi. Er adam jansaqtaý bóliminde kóz jumdy» delingen jazbada.

Oqıǵa týraly memlekettik mekemelerge habarlanyp, tergeý bastaldy. Jazataıym oqıǵanyń mán-jaıy men sebepteri anyqtalyp jatyr.

«Qazhrom» TUK» AQ basshylyǵy men ujymy marqumnyń týǵandary men jaqyndarynyń qaıǵysyna ortaqtasyp, kóńil aıtady. Zaýyt marqumnyń otbasyna barlyq qajet kómek kórsetiletinin atap ótti.

Foto: herrmanandherrman.com