Aqsý ferroqorytpa zaýytynda órt sóndirip júrgen qutqarýshy aýrýhanaǵa tústi

AQSÝ. QazAqparat - Aqsý ferroqorytpa zaýytynan shyqqan órt kezinde joǵary temperatýra áserinen ǵımarattyń tóbesi opyrylyp tústi. Órt sóndirýshi zardap shekti, dep habarlaıdy QazAqparat tilshisi.

«Órt sóndirýshi aýrýhanaǵa jatqyzyldy. Jaǵdaıy ortasha aýyr», - dep habarlady jýrnalısterge Pavlodar oblysy tótenshe jaǵdaılar departamentiniń baspasóz qyzmeti.

Qyzyl jalynnyń qansha aýmaqty sharpyǵany órt tolyq sóndirilgennen keıin belgili bolady.

Qazir №15 belgide akkýmýlıator bólmesinde shamamen 50 sharshy metr alańda jabdyqtar men sorǵy maıy janyp jatyr.

Eske sala keteıik, búgin Aqsý ferroqorytpa zaýytynyń №4 balqytý tsehynda pesh transformatory órtengenin habarlaǵan edik.

Ot 21 maýsym kúni saǵat 16:00-de tutanǵan.

«Órtti kásiporynnyń apattyq-qutqarý qyzmeti men Aqsý qalalyq órt sóndirý bólimi oqshaýlady. Zardap shekkender joq. Pavlodar oblysy tótenshe jaǵdaılar basqarmasy shtab qurdy. Tergeý bastaldy. Órttiń shyǵý sebepteri anyqtalyp jatyr», - dedi Aqsý ferroqorytpa zaýytynan.