Aqsý ferroqorytpa zaýyty 50 jyl jınaqtalǵan kúl qaldyǵyn óńdeıdi
PAVLODAR. QazAqparat - Pavlodar oblysynyń ákimi Bolat Baqaýov Aqsý qalasyndaǵy óndiris oryndaryn aralap, birqatar jańa jobamen tanysty.
Aımaq basshysy metallýrgter shaharyndaǵy jumys saparyn «Monoqalalardy damytý» jáne «Bıznestiń jol kartasy-2020» baǵdarlamalary aıasynda sýbsıdııalanǵan «DANıER» JShS-nen bastady, dep habarlaıdy pavlodarnews.kz.
Oblys ákimine jobanyń jetekshisi Nurlan Nurmaǵambetov aldaǵy josparlar týraly málimdedi. Onyń aıtýynsha, búgingi tańda polıetılen qubyrlardy shyǵaratyn atalmysh seriktestik óndiris aýqymyn keńeıtedi. Kelesi jyly túzý tigisti temir qubyrlar daıyndaý tsehyn qoldanysqa engizýdi kózdep otyr.
«Óndiris orny 2018 jyly iske qosylýy tıis. Jańadan turǵyzylǵan tsehtyń aýdany 4000 sharshy metrdi quraıdy. Tsehqa qajetti jabdyqtar osy aptada Qytaıdan jetkizilgen. Qurylǵylardy kelesi aptada ornatýdy bastaımyz. 133-325 dıametrlik túzý tigisti temir qubyrlardy ázirleıtin bolamyz. Jobanyń quny - 1 mlrd 100 mln teńge. Josparly óndiristik qýaty jylyna 37 myń tonna. 80 adamdy jumyspen qamtıtyn bolamyz», - deıdi «DANıER» JShS dırektorynyń orynbasary Álisher Tutqylov. Aıta keteıik, daıyn qubyr ónimin satý naryǵy Qazaqstan jáne kórshi elder bolmaq. Budan soń óńir basshysy «Eýrazııalyq energetıkalyq korporatsııasy» AQ elektr stansasynyń № 5 energoblogynda júrgizilip jatqan jańartý jumysyn tekserip shyqty. Munda quny 55,2 mlrd teńgeni quraıtyn jóndeý jumysy 2015 jyly bastalǵan bolatyn. - 2018 jyly energoblok iske qosýly tıis. Barlyq jumystar belgilengen merzimde aıaqtalady. Jańartý elektr stantsııasynyń qýattylyǵyn 25 megavatka arttyrady, - dep sendirdi AQ prezıdenti Valerıı Grınenko. Jumys sapary Aqsý ferroqorytpa zaýytynan shyǵatyn kúldi ekinshi qaıtara óńdeýge arnalǵan jańa keshende jalǵasty. Eýrazııalyq energetıkalyq korporatsııasynyń quramyna enetin «KazHrom» AQ Aqsý ferroqorytpa zaýyty aýmaǵynda ornalasqan keshen jylyna 130 myń tonna metall kontsentratyn shyǵaratyn qýaty bar. Bes jyldyń ishinde kásiporyn óndiris alybynyń 50 jylǵa jýyq ýaqyt jınaqtalǵan 4 mıllıonnan astam kúl qaldyǵyn óńdep, osy shıkizattan qurylysqa qajetti, órtke turaqty qıyrshyqtas pen qum alady. «KAZRÝDPROM PK» JShS kompanııasynyń atqarýshy dırektory Stanıslav Golovınnyń sózine súıensek, keshende shlamdy súzgileıtin ishki tuıyq sý kontýry bar. Bul qorshaǵan ortany lastaýdan tolyq qorǵaıdy. Qazirgi tańda jańa óndiris keshenin turǵyzý úshin uzaqmerzimdi jalǵa berýge 25 gektar jer bólindi.
