Aqsý ferroqorytpa zaýytynda jumysshy qaza tapty
PAVLODAR. KAZINFORM — Qaıtys bolǵan azamat 2002 jyly týǵan. Kásiporynda eki jylǵa jýyq eńbek etip kelgen.
Aqsý ferroqorytpa zaýytynda ÝDIF-1 metall usaqtaý qondyrǵysymen jumys isteý kezinde jumysshy mert boldy.
— Qaıǵyly oqıǵa 20 sáýir kúni túski saǵat úshter shamasynda tirkelgen. Aldyn ala boljam boıynsha, metall usaqtaý tsehynyń jumysshysynyń ústine metall kesekteri qulaǵan bolýy múmkin. 2002 jyly týǵan er azamat oqıǵa ornynda qaza tapqany anyqtaldy. Marqum zaýytta 1-2 jyldaı eńbek etken. Bizdiń ınspektsııa mamandary qazirgi ýaqytta oqıǵa boıynsha tergeý-tekserý sharalaryn júrgizip jatyr, nátıjesi shamamen 10 kúnde belgili bolyp qalady, — dep habarlady Memlekettik eńbek ınspektsııasy komıtetiniń Pavlodar oblysy boıynsha departamentiniń bas mamany Qanat Arqalyqov.
Jalpy Aqsý ferroqorytpa zaýytyndaǵy jazataıym oqıǵalar jıi bolatynyn aıtýymyz kerek.
Máselen, 2024 jyldyń mamyr aıynda Aqsý ferroqorytpa zaýytynyń eki mashınısi kúıip qaldy.
Keıin kúıip qalǵan mashınıst qyzdyń biri aýrýhanada kóz jumdy.
Al byltyr qyrkúıek aıynda kásiporynda taǵy úsh jumysshyny kúıik shalsa, qarasha aıynda taǵy bir jumysshy kúıik jaraqatyn aldy.
