Aqsý ferroqorytpa zaýyty óndiristi tsıfrlandyrý arqyly tıimdilikti arttyrdy
PAVLODAR. KAZINFORM – Pavlodar oblysynda ótken baspasóz týry aıasynda óńirdegi BAQ ókilderine «Qazhrom» TUK» AQ quramyndaǵy Aqsý ferroqorytpa zaýytynyń tsıfrlyq transformatsııasy tanystyryldy.
Zaýytta óndiristik protsesterdi avtomattandyrý men tsıfrlyq tehnologııalardy engizý strategııalyq basymdyqqa aınalǵan. Qazirgi tańda bul tehnologııalar óndiristiń qaýipsizdigin, tıimdiligin jáne ornyqtylyǵyn arttyryp, eńbek jaǵdaılaryn jaqsartýǵa múmkindik berip otyr.
– Tsıfrlandyrý – bul bolashaq emes, búgingi kúnniń ózekti máselesi. Zaýyttyń barlyq negizgi óndiristik bólimsheleri shıkizat qabyldaýdan bastap daıyn ónimdi jóneltýge deıin tolyqtaı avtomattandyrylǵan júıemen jabdyqtalǵan, – dedi zaýyt dırektory Musabek Maqashev.
Onyń aıtýynsha, 2024 jyly tsıfrlandyrýǵa 1 mıllıard teńgeden astam ınvestıtsııa quıylǵan. Bul bastama sheteldik sheshimderge táýeldilikti azaıtyp, otandyq tehnologııalardy paıdalanýǵa jol ashady.
Baspasóz týry barysynda zaýyttyń jetekshi IT-jobalary da tanystyryldy. Solardyń biri – Dispatch – temirjol kóligin basqarý júıesi. Joba jetekshisi Dmıtrıı Rodygınniń aıtýynsha, buryn vagondardyń qozǵalysyn baqylaý Excel kesteleri, qaǵaz jáne telefon arqyly júrgizilse, endi veb-qosymsha arqyly tolyq avtomattandyrylǵan.
– Tek Aqsý zaýytynyń ózinde táýligine 900-ge jýyq vagon qozǵalysy tirkeledi. Dispatch júıesi osy aýqymdy operatsııany jeńildetip, naqty jáne jedel baqylaý júrgizýge múmkindik beredi, – dedi ol.
Sonymen qatar, zaýytta metallýrgterdiń densaýlyǵyn baqylaý maqsatynda avtomattandyrylǵan medıtsınalyq tekserý júıesi engizilgen. BTS komandasy ázirlegen bul joba aýysym aldyndaǵy jáne keıingi tekserýdi birneshe mınýt ishinde ótkizýdi qamtamasyz etedi.
Búginde zaýyttyń úsh bólimshesine 19 apparat ornatylǵan. 2026 jylǵa deıin bul júıe barlyq tsehtardy qamtıtyn bolady. Bul – ERG kompanııasynyń qyzmetkerler densaýlyǵy men qaýipsizdigin basty orynǵa qoıatyndyǵynyń aıqyn dáleli.
Aıta keteıik, Mańǵystaý oblysynda jańa gaz óńdeý zaýytynyń qurylysy jalǵasyp jatyr.