Aqsý aýmaǵynda Ertiske 23 tonna baktıtsıd tógildi
ASTANA. QazAqparat - Bıyl Pavlodar oblysynda masaǵa qarsy alǵashqy aýqymdy naýqan bastaldy, dep habarlaıdy pavlodarnews.kz.
Aqsýda barjadan Ertiske 23 tonna bıologııalyq baktıtsıd preparaty aǵyzyldy. Óńdeý jumystarynyń nátıjesin mamandar 48-72 saǵattan keıin kóre alady.
Óńirlik energetıka jáne turǵyn úı-kommýnaldyq sharýashylyǵy basqarmasynyń mamany Erlan Turgeldınovtyń aıtýynsha, kúnniń sýyq bolǵanyna baılanysty qansorǵyshtar kórinbegenmen, qazir jándikterdiń dernásilderi úshinshi satyǵa deıin damyǵan shaq. Bul bolashaq shybyn-shirkeıdiń aýyzy qalyptasty degen sóz.
«Pavlodar oblysynda masaǵa qarsy 199,6 myń tonna «Baktıtsıd» preparaty satyp alynǵan. Bul maqsatta bıýdjetten 498,6 mıllıon teńge bólingen. Ǵylymı toptyń boljamyna súıensek, qansorǵyshtardyń atalǵan túrin ýlaý úshin qazir eń qolaıly kezeń. Aýa raıynyń qolaısyzdyǵy men kóktemniń uzaqqa sozylýynan masalar damýyn toqtatyp qalsa, endi birde kúrt damı bastaıdy. Oǵan qosa, mamyr aıy salqyn bolyp turǵany belgili. Sondyqtan preparat tıimdi nátıje beretin sátti paıdalaný kerek. Preparat dernásilderdiń ishek joldaryna túsedi, nátıjesinde jándikter ólip qalady. «Baktıtsıd» flora men faýnaǵa eshbir zııan tıgizbeıtinin atap ótken jón. Adam densaýlyǵyna da qaýipsiz», - deıdi Erlan Turgeldınov.
Pavlodar oblysynda Reseı shekarasynan ShQO-ǵa deıin uzyndyǵy 800 shaqyrym ózen boıyn óńdeý josparlanǵan. Óńdeý sharalaryn «Barrakýda-Pavlodar» JShS ǵylymı tobynyń jáne qoǵamdyq keńes, jýrnalıster men depýtattardyń baqylaýymen «VETDEZ-PV» merdigerlik uıymy ótkizedi.
Aqsý qalalyq máslıhatynyń depýtaty Andreı Gorohovtyń sózinshe, barjaǵa jınalǵan halyq qalaýlylary bıologııalyq ýlaǵysh zat bar ydystardy tekserip, kanıstrlardyń barlyǵy zaýyttan shyqqan plombamen bekitilgenin jáne saqtaý merzimi buzylmaǵanyn baqylaǵan.
«Bıyl jazda halyq ózin jaıly sezinedi degen úmittemiz, - deıdi Andreı Gorohov. - Kezinde turǵyndar shybyn-shirkeıdiń saldarynan balalardy alańdarǵa jiberýge qorqatyn».
Eske sala keteıik, Aqsý men Kenjekólde Ertis jaıylymyn áýeden óńdeý 17 mamyrda bastalǵan. Osy kúnder aralyǵynda 4,2 gektar óńdelgen. Degenmen barjadan mundaı kólemde dernásilderge qarsy preparat birinshi ret quıylýda.
