Aqsý aýdanynyń aýyldaryndaǵy qalpyna keltirý jumystaryna atsalysqan 200-den astam adam qurmet gramotalarymen marapattaldy
TALDYQORǴAN. Qyrkúıektiń 22-si. QazAqparat /Sandýǵash Dúısenova/ - Qyzylaǵashtaǵy keleńsiz jaǵdaı eshkimdi beı-jaı qaldyrǵan joq,
osy qaıǵyly oqıǵa kezinde Qazaqstan halqynyń eń jaqsy qasıetteri - adamdardyń qaıǵysyna ortaqtasý, yntymaqtasý, birigý qasıetteri taǵy da kórindi. Bul týraly Almaty oblysynyń ákimi Serik Úmbetov búgin Qyzylaǵashta ótken arnaıy shtabtyń sońǵy otyrysynda málim etti.
Ákimniń aıtýynsha, oblystyń ishki ister jáne tótenshe jaǵdaılar departametteriniń qyzmetkerleri tabıǵat apatynyń saldaryn joıýǵa belsendi atsalysty. «TATEK», «Qazaqtelekom» kompanııalary, kommýnaldyq sharýashylyq, jolaýshylar tasymaldaý jáne avtokólik joldary qyzmetteri elektr jáne telefon baılanystaryn qalpyna keltirý, aýyz sý qubyrlaryn tartý, jol tóseý jumystarynda jedeldik kórsetti.
«Adamdardyń qaıǵysyna ortaqtasqandaryńyz úshin Sizderge úlken alǵys. Qyzylaǵash oqıǵasy bizdiń daıyndyqtarymyzdyń joǵary deńgeıin kórsetti. Muny Elbasy da baǵalap otyr, sol kisiniń jáne búkil Qazaqstan halqynyń qoldaýynyń arqasynda, biz qysqa ǵana merzimniń ishinde aýyldardy qalpyna keltirdik. Endigi mindet - osy aýyldardy búgingideı taza kúıinde saqtap, ári qaraı abattandyra, kógaldandyra túsý», dep atap kórsetti oblys ákimi óz sózinde.
Aýyldardaǵy qalpyna keltirý jumystaryna tikeleı atsalysqan 200-den astam adam búgin Qyzylǵashta ótken jıynda qurmet gramotalarymen jáne alǵys hattarmen marapattaldy.
