Aqsý aýdanyndaǵy Qyzylaǵash aýylyna 33 otbasy oraldy
ALDYQORǴAN. Naýryzdyń 15-i. QazAqparat /Sandýǵash Dúısenova/ - Aqsý aýdanynyń Qyzylaǵash aýylynda Tótenshe jaǵdaılar mınıstri Vladımır Bojkonyń jáne oblys ákimi Serik Úmbetovtyń, ortalyq jáne jergilikti atqarýshy organ basshylarynyń qatysýymen Sý tasqynynyń saldaryn joıý jónindegi úkimettik komıssııanyń tórtinshi májilisi ótti.
Oblys ákiminiń baspasóz qyzmetinen habarlaǵandaı, sý tasqynynyń beti qaıtqannan keıin aýylǵa 33 otbasy oraldy. Aýylda qalǵan adamdardy barlyq qajettimen, onyń ishinde kómirmen, ballondy gazben, aýyz sýmen, sondaı-aq aman qalǵan maldar úshin jem-shóppen qamtamasyz etý sharalary qabyldandy. Aýylǵa oralǵan turǵyndarǵy jalaqy berip, qalpyna keltirý jumystaryna tartý týraly da tapsyrma berildi. Bul shara áleýmettik problemalardy tómendetýge múmkindik beredi.
Naýryzdyń 14-inde mektep men aman qalǵan 120 úı elektr jelisine qosyldy. Telefon baılanysymen qamtamasyz etý úshin radıoantenna ornatyldy. Ózenniń ar jaǵynda ornalasqan Aqtoǵan bólimshesine jaryq pen telefon baılanysy naýryzdyń 15-inde tartylady.
Qazir aýylda mektep ǵımaratynyń birinshi qabatynyń terezelerine shynylar salý, aýylǵa oralǵan turǵyndar ýaqytsha ornalasýlary úshin kerýetter ornatý jumystary aıaqtalyp keledi. Mektep aýlasynda qoǵamdyq tamaqtandyrý qosyny ornatyldy. Oǵan qosa, dala lageriniń ornyna taǵy eki qoǵamdyq tamaqtandyrý qosyny ornatylyp, aýyl turǵyndary men qutqarý qyzmetkerleri úshin tegin ystyq tamaq uıymdastyryldy. Aýylda táýlik boıy polıtsııa narıadtarynyń kezekshiligi uıymdastyrylǵan, sonyń arqasynda ázirge birde-bir múlik urlaý faktisi tirkelgen joq.
Oblys ákimi Serik Úmbetovtyń tapsyrmasy boıynsha barlyq otarlar kerek-jaraqtarmen qamtamasyz etildi. Rýlondy shópter, azyq-túlikter shopandarǵa tikushaqpen jetkizilýde. Osy maqsatta Balqash aýdanynan apat bolǵan aýmaqqa 45 tonnadan astam pishen jetkizildi. Iesiz júrgen 87 bas úı maly qaýipsiz aýmaqqa kóshirildi.
Ákimniń tapsyrmasy boıynsha oblystyń barlyq aýdandary men qalalary Aqsý aýdanyna qaıyrymdylyq kómek - azyq-túlikter, kıim-keshekter, malǵa arnalǵan jem-shópter jóneltýde.
