Aqshuqyr aýylynda jel elektr stansysy iske qosyldy - Mańǵystaý oblysy
«Qýaty 5 MVt quraıtyn keshenniń qurylysy barysynda 11 adam jumysqa tartyldy. Aldaǵy ýaqytta 20-dan astam jumys ornyn qurýǵa múmkindik bar», - dedi «BEST-Group NS» JShS kompanııasynyń ókilderi. Atalǵan kompanııa stansy qurylysyn 2017 jyldyń kúz aıynda bastaǵan. Qurylys-montaj jumystaryn otandyq mamandar jasap, zaýyttyń týrbınalary halyqaralyq sapa standarttaryna sáıkes sertıfıkattalǵan.
Joba maqsaty- jel elektr stansylaryn paıdalaný arqyly negizgi energııa kózderin almastyrý, Qazaqstandaǵy parnıktik gaz qaldyqtaryn azaıtý, sol arqyly klımattyń ózgerýi týraly BUU-nyń Negizdemelik konventsııasyna sáıkes jumys jasaý.
«Endi bir aıdan soń óz ónimderimizdi sata bastaımyz. Ónimdi satyp alýshylar «Esepteý jáne qarjy ortalyǵy» JShS bolmaq. Germanııa elinde jasalǵan qondyrǵylardyń arqasynda stansy, jel qýatyn paıdalaný arqyly elektr energııasyn óndirip, oǵan qajettilikti tolyq óteıtin bolady. Aqshuqyr aýylynyń turǵyndary, sondaı-aq aýyl mańyndaǵy óndiris oshaqtary men jylyjaılar úshin elektr qýatyna degen tapshylyqty joıady» - dedi jobanyń damý jónindegi dırektory Gúlnár Ábıtova.
Sonymen qatar qazirgi tańda QR Energetıka mınıstrligimen taǵy úsh jobany júzege asyrý boıynsha jumystar júrgizilýde.
«Atap aıtqanda, Beıneý aýdany Beıneý aýylynda, Qaraqııa aýdany Jetibaı aýylynda, Mańǵystaý aýdany Shetpe aýylynda qýaty 10-15 MVt qamtıtyn jel jáne kún elektr stansylarynyń keshendi jospary daıyndalýda» - dedi Mańǵystaý oblysynyń Energetıka jáne turǵyn úı-kommýnaldyq sharýashylyq basqarmasynyń basshysy Jandos Salımov.