AQSh‑taǵy ımmıgratsııalyq reıdten keıin Ońtústik Koreıaǵa 316 adam oraldy

ASTANA. KAZINFORM — Jalpy sany 316 jumysshy ótken aptada AQSh-taǵy ımmıgratsııalyq reıd kezinde ustalyp, Ońtústik Koreıaǵa oraldy. Bul týraly juma kúni jergilikti telearna habarlady, dep jazady Sınhýa.

Atalǵan jumysshylar men basqa 14 sheteldik adamnan quralǵan charterlik ushaq eldiń astanasy Seýldiń batysynda ornalasqan Inchhon halyqaralyq áýejaıyna jergilikti ýaqyt boıynsha shamamen 15:23‑te (Grınvıch boıynsha 06:23) qondy.

Ushaq Atlanta qalasyndaǵy Hartsfıld‑Djekson halyqaralyq áýejaıynan shamamen 15 saǵat buryn ushyp shyqqan.

Esterińizge sala keteıik, 4 qyrkúıekte AQSh-ta Hyundai Motor Group pen LG Energy Solution birlesken kásipornyna tıesili elektromobıl akkýmýlıatorlaryn óndiretin zaýyttyń qurylys alańynda ımmıgratsııalyq jáne kedendik baqylaý organdary operatsııa ótkizdi.

Operatsııa kezinde 475 adam ustaldy, onyń ishinde 300‑den astam ońtústikkoreıalyq qyzmetshi bar. Olar sodan beri Djordjııa shtatyndaǵy Folkstondaǵy arnaıy ortalyǵynda boldy.

Ońtústik Koreıa prezıdenti Lı Chje Men beısenbi kúni prezıdenttik qyzmettegi 100 kúnge arnalǵan baspasóz máslıhatynda AQSh‑taǵy ınvestıtsııalarǵa qatysty alańdaýshylyǵyn bildirdi.

— Qazirgi jaǵdaıda bizdiń kompanııalar AQSh‑qa tikeleı ınvestıtsııalar jasaý týraly sheshim qabyldaǵanda óte saq bolady, — dedi ol.

Osyǵan deıin habarlanǵandaı, 

AQSh-tyń Djordjııa shtatyndaǵy Hyundai zaýytynda 500-ge jýyq adam ustalǵanyn jazǵan edik. Ustalǵandardyń kópshiliginiń vızalarynyń merzimi ótip ketkeni nemese el aýmaǵynda zańsyz júrgeni anyqtalǵan.