AQSh–Iran kelissózderi aıasynda Brent munaıynyń baǵasy 4%-dan astam arzandady
ASTANA. KAZINFORM – AQSh pen Iran arasyndaǵy kelissózder men Vashıngtonnyń jaǵdaıdy shıelenistirmeýge degen umtylysy týraly málimdemesinen keıin álemdik munaı baǵasy kúrt tómendedi, dep habarlaıdy Kazinform agenttigi.
Tańǵy saýda barysynda Brent markaly munaıdyń baǵasy 4,4 paıyzǵa arzandap, barreline 82,08 AQSh dollaryna deıin tústi. Al WTI markaly munaıdyń quny bir aptadan astam ýaqyttan beri alǵash ret barreline 80 dollardan tómendedi.
Osy jaǵdaı aıasynda AQSh qor naryǵyndaǵy saýda-sattyq árkelki nátıjemen aıaqtaldy. Investorlar jartylaı ótkizgishter óndiretin kompanııalar men jasandy ıntellekt tehnologııalaryn ázirleýshilerdiń aktsııalary boıynsha tabysyn tirkep, qarjylyq kórsetkishteri joǵary bolǵanymen, aktsııalary aıtarlyqtaı qymbattamaǵan kompanııalarǵa ınvestıtsııa kólemin ulǵaıtty.
Saýda qorytyndysy boıynsha S&P 500 ındeksi 15,60 tarmaqqa nemese 0,2 paıyzǵa ósip, 7 428,78 tarmaqqa jetti. Dow Jones ındeksi 537,24 tarmaqqa nemese 1 paıyzǵa kóterilip, 52 747,32 tarmaqty qurady. Al Nasdaq Composite ındeksi 55,17 tarmaqqa nemese 0,2 paıyzǵa tómendep, 24 876,91 tarmaq deńgeıinde jabyldy.
Naryq qatysýshylary endi 29 shildede ótetin AQSh Federaldyq rezerv júıesiniń kezekti otyrysyn kútip otyr.
Fıýcherstik naryqtaǵy baǵalaýlarǵa sáıkes, ınvestorlar retteýshi negizgi paıyzdyq mólsherlemeni ózgerissiz qaldyrady dep kútedi. Soǵan qaramastan, naryqtyń bir bóligi bıylǵy jyldyń sońyna qaraı mólsherleme qaıta kóterilýi múmkin degen boljamdy da joqqa shyǵarmaı otyr.
Osyǵan deıin Iran men AQSh arasyndaǵy qaqtyǵystyń báseńdeýine baılanysty álemdik munaı baǵasy aıtarlyqtaı túskeni týraly jazǵan edik.
