AQSh–Iran qaqtyǵysy: Eýroodaq energııaǵa 27 mlrd eýro artyq tóledi
ASTANA. KAZINFORM - Iranmen soǵys Eýropanyń ekonomıkasyna salmaq túsirip otyr. Eýroodaq elderi úshin energııa ımporty aıtarlyqtaı qymbattaǵan. Qaqtyǵystyń nebári 60 kúni ishinde satyp alý kólemi ózgermese de, shyǵyn 27 mlrd eýrodan asyp ketken.
Bul derekterdi Strasbýrgte Eýropalyq komıssııa tóraǵasy Ýrsýla fon der Lıaıen jarııalady, dep habarlaıdy BILD.
Eýroparlament, Eýropalyq keńes jáne Komıssııa ókilderi Taıaý Shyǵystaǵy daǵdarystyń saldaryn talqylady. Osy jıynda Ýrsýla fon der Lıaıen:
- Qaqtyǵystyń nebári 60 kúni ishinde qazba otyn ımporttaýǵa jumsalatyn shyǵyn 27 mlrd eýrodan asty. Biraq biz bir de bir qosymsha energııa resýrsyn alǵan joqpyz, — dedi.
Onyń aıtýynsha, Eýropa qazba otynǵa táýeldilikten arylýy tıis. Onyń ornyna qoljetimdi ári ekologııalyq taza energııa kózderine kóshý qajet. Mysal retinde ol Shvetsııany atady. Bul elde elektr energııasynyń basym bóligi jańartylatyn kózder men atom elektr stantsııalarynda óndiriledi. Sonyń nátıjesinde energııa baǵasynyń ósimi ózge eldermen salystyrǵanda áldeqaıda tómen boldy.
Eýroodaq aldaǵy ýaqytta kólik, ónerkásip jáne jylytý salalarynda elektr energııasyna kezeń-kezeńimen kóshýge nıetti. Bul baǵytta árbir múshe memleket óz sheshimin qabyldaıdy. Eýropalyq komıssııa ótken aptada birqatar usynys engizdi. Olardyń qatarynda tabysy tómen otbasylarǵa arnalǵan energetıkalyq vaýcherler, energııa únemdeıtin ónimderge qarjylaı qoldaý jáne energııa tıimdiligin arttyrýǵa baǵyttalǵan aqparattyq naýqandar bar.
Ýrsýla fon der Lıaıenniń aıtýynsha, mundaı kómekter naqty muqtaj azamattar men zardap shekken salalarǵa baǵyttalýy kerek. Sonymen qatar bul sharalar gaz ben munaı tutynýdy arttyrmaýy tıis.
Osyǵan deıin Taıaý Shyǵystaǵy qaqtyǵys saldarynan Eýroodaq elderinde gaz baǵasy 70% óskenin jazdyq.
