«Aqshyń» saýda úıindegi jaǵdaı oblys ákimdiginiń jeke baqylaýyna alyndy
ASTANA. KAZINFORM – Oblys ákimi Nurlan Uranhaev «Aqshyń» saýda úıiniń kásipkerlerimen kezdesti. Jıynǵa TJD, Polıtsııa departamentiniń ókilderi, oblys ákimdigi basqarmalarynyń basshylary men qala turǵyndary qatysty.
Qazirgi ýaqytta memleket tarapynan qajetti qoldaý sharalary qarastyrylyp jatyr. Órtten zardap shekken kásipkerlerdiń quqyǵyn qorǵaý, týyndaǵan máseleni sheshýmen aınalysatyn «jumys jáne jedel-tergeý» toby quryldy.
«Men sizderge qoldaý jasalatynyn jáne bul jaǵdaıǵa baılanysty jan-jaqty ashyq sheshim qabyldaýǵa kepildik beremin. Memlekettik kómektiń barlyq tetigi usynylady. Arnaıy qor qurý josparlanǵan, óıtkeni jergilikti kásipkerlerdiń de kómektesýge nıeti bar. Biz jaǵdaı rettelmeıinshe óz ónimińizdi satatyn 13 saýda ornyn usynamyz», - dedi oblys ákimi Nurlan Uranhaev.
Kezdesý barysynda memlekettik organdarmen birlesip barlyq máseleni qarastyratyn kásipkerlerden bastamashyl top qurý usynyldy.
Aıta keteıik, Semeı qalasyndaǵy iri «Aqshyń» saýda ortalyǵyndaǵy órtke qatysty jaǵdaı QR Úkimetiniń jáne oblys ákiminiń jeke baqylaýyna alyndy.
