Aqsháýliden samǵaǵan Alash balasyna jerlesteri qoldaý kórsetti
ASTANA. QazAqparat - Rıo Olımpıadasyna grek-rım kúresinen ulttyq qurama sapynda attanǵan Dosjan Kártikovke týǵan eli Aıagóz halqy da sáttilik tiledi. Ózi 6 jyl jattyqqan aýdandyq sport mektebinde jas sportshylar men jerlesteri erekshe fleshmob ótkizdi, dep habarlady www.24.kz.
Qoınaýy tarıhqa toly Aqsháýli taýynyń eteginde týyp-ósken Dosjan eń alǵashqy jeńisine 5 synypta aýdandyq jarysta qol jetkizgen edi. Sodan beri kóptegen respýblıkalyq jáne halyqaralyq caıystarda top jardy. Byltyr Amerıkanyń Las-Vegas qalasynda ótken álem chempıonatynda qola júldeger atanyp, Olımpıadaǵa joldama alyp qaıtty. Bul salmaqta 6 álem chempıony, Olımpıadanyń 2 altyn jáne 1 kúmis júldegeri baq synaǵanyn esterińizge sala keteıik. Jerlesimiz alǵashqy beldesýine 14 tamyzda shyǵady.
«Dosjan bala kezinen namysty, jigerli boldy. Ol tek qana kúreste emes, bizde ótip jatqan fýtbol bolsyn, qandaı jarysta bolsyn alda, óz komandasyn uıymdastyryp, alǵa tarta biletin jigit boldy. Osy Rıo Olımpıadasynda onyń jeńiske jetetinine biz senemiz. Óıtkeni ol qazaqtyń namysyn qorǵaı biletin, qazaqtyń týyn kókke kóteretin jigitimizdiń biri dep esepteımiz», - dedi D.Kártikovtiń alǵashqy jattyqtyrýshysy Muhtar Abdýllın.
«Ózi kelip, jatyp, qymyzynan iship, demalyp qaıtty. Taýǵa shyqty, Aqsháýliniń basyna shyqty. 20 jyl kúreske qatysty, 20 jyldyq eńbegi aqtalsyn degim keledi. Táýelsizdiktiń 25 jyldyǵyna úlken syılyqpen ortamyzǵa oralsa, halqymyzdy qýantsa, halqym qýansyn deımin!», - dedi Dosjannyń anasy Baqytgúl Kártikova.
