Aqshanyń birshama bóligi gastarbaıterlerge ketip jatyr - Kósherbaev
ASTANA. QazAqparat - Qyzylorda oblysynyń ákimi Qyrymbek Kósherbaevtyń aıtýynsha, búginde jumyspen qamtý sııaqty memlekettik baǵdarlamalardyń tıimdiligin tekserý kerek. Bul týraly óńir basshysy Astanadaǵy Qazmedıa ortalyǵynda ótken beıresmı kezdesý barysynda aıtty, dep habarlaıdy QazAqparat tilshisi
"Menińshe, eńbek mıgranttaryna qatysty talaptardy kúsheıtý kerek. Qazaqstan azamattaryna birinshi kezekte kóńil bólgen jón. Sebebi jumyspen qamtý sharalary aldymen óz azamattarymyzdy eńbekpen qamtamsyz etý úshin qolǵa alyndy. Endi, bizde (oblysta - avt) jalaqynyń kólemi úlken emes, 40-50 myńdaı. Gastabaıterler kelip, ol aqshany alyp júredi. Al ondaı azamattar óz úılerine, Ózbekstan, Tájikstan men Qyrǵyzstanǵa bankter arqyly qansha aqsha jiberip otyrady? Osyny áli de tekserý kerek. Áıtpese, erteń memlekettik baǵdarlamalardyń arqasynda gastarbaıterlerdi asyrap otyrǵan bolyp shyǵamyz",- deıdi Kósherbaev. Ákimniń aıtýynsha, aldaǵy ýaqytta memlekettik qoldaý sharalary aıasyndaǵy qarjyny ulǵaıtý qajet. Sebebi qazirgi 40-50 myń teńge tym az bolyp tur.
Aıta keteıik, búgin oblys basshysy kúrishti eksportqa shyǵarý boıynsha aldaǵy josparlarymen de bólisti. Sondaı-aq mıllıardtaǵan aqshasy urlanǵan shyny zaýytyn iske qosý merzimin atady.
