«Aqshańyzdy qaıtaryp beremiz»: Aldanǵan adamdarǵa alaıaqtar qaıta habarlasyp jatyr

SEMEI. KAZINFORM – Abaı oblysynyń polıtseıleri aldanǵan adamdarǵa alaıaqtardyń qaıta habarlasyp jatqanyn eskertti.

Alaıaqtar buryn ınternet-alaıaqtarǵa aldanyp qalǵan azamattardyń derekterin taýyp, qaıta habarlasyp jatyr. Keı zardap shegýshiler áleýmettik jelidegi jalǵan jarnamalar arqyly ózderi de solarǵa baılanysqa shyqqan.

- Ózin «zańger», «qarjy keńesshisi», «arnaıy tergeý tobynyń ókili» nemese «alaıaqtardan zardap shekkenderge kómektesetin uıymnyń qyzmetkeri» retinde tanystyratyn belgisiz tulǵalar «sizdiń isińizdi bilemiz», «alaıaqtarǵa ketken qarajatty qaıtaryp beremiz», «bizdiń kómegimizben aqshańyzdy tolyq óndirip alýǵa bolady» dep azamattardyń senimine kirýge tyrysady. Alaıda bul – alaıaqtardyń ekinshi ret aldaý shemasy, - dep eskertti Abaı oblysy Polıtsııa departamentinen.

Olar ártúrli syltaýmen qyzmet kórsetý aqysyn, memlekettik baj ben saqtandyrý tólemin aldyn ala tóleýdi talap etedi. Osylaısha, azamattar taǵy da iri kólemde qarjylyq shyǵynǵa ushyraıdy.

- Quqyq qorǵaý organdary eshqashan telefon, messendjer nemese áleýmettik jeli arqyly aqsha talap etpeıdi. Alaıaqtarǵa ketken qarajatty «jyldam ári kepildikpen» qaıtaryp beremiz deý shyndyqqa janaspaıdy. Resmı zańgerler men memlekettik organdar aldyn ala tólem suramaıdy. Sondyqtan eger sizge osyndaı qońyraý tússe eshqandaı tólem jasamańyz, dereý telefondy qoıyńyz. Jeke derekterińizdi, bank kartasynyń nómirin, SMS-kodtardy aıtpańyz, - delingen aqparatta.

Eske salsaq, osyǵan deıin ShQO-da alaıaqtar «baılanys kompanııasynyń qyzmetkeri» bolyp halyqty aldap jatqany habarlanǵan.