«Aqshańyzdy qaıtaramyz»: Alaıaqtar buryn aldanǵan adamdarǵa polıtsııa atynan habarlasyp jatyr
SEMEI. KAZINFORM – Abaı oblysynyń polıtseılerdi azamattardy alaıaqtardyń jańa qylmystyq ádis-tásilderi týraly eskertti.
Oblystyq polıtsııa departamenti baspasóz qyzmetiniń málimetine súıensek, qazirgi tańda alaıaqtar halyqqa bank qyzmetkeri retinde emes, quqyq qorǵaý organynyń ókili bolyp jıi qońyraý shalýǵa kóshken.
– Olardyń tásilderi ár túrli. Mysaly, sizdiń jeke derekterińizdiń urlanǵanyn, atyńyzǵa nesıe rásimdelip jatqanyn jáne osyǵan baılanysty izdeýde ekenińizdi aıtyp, qorqyta bastaıdy. Alaıaqtar senimge kirý úshin bankke barmaýdy, qolma-qol aqshańyzdy tez arada «saqtandyrý» qajettigin,bankten arnaıy ýákiletti adam kelip, aqshańyzdy ýaqytsha alyp ketetinin aıtady. Olar bul aqshany «deklaratsııalap, qaýipsiz shotqa ornalastyramyz» dep sendiredi. Osylaısha, azamat qolma-qol aqshasynan aıyrylyp qalady, - delingen aqparatta.
Ekinshi qadam – qaskóıler buǵan deıin alaıaqtyń qurbany bolǵan adamdarǵa habarlasady.
– Olarǵa aıyrylyp qalǵan aqshalaryn qaıtaryp alýǵa kómektesetinin, alaıaqty tapqanyn aıtady. Onyń úıine baryp, aqshany alyp kelip, ony saqtandyrý maqsatynda qaýipsiz shotqa aýdarý kerektigin eskertedi. Osylaısha bir azamat aqshasynan aıyrylsa, ekinshi azamat óziniń alaıaqtyq shemada «dropper» bolǵanyn ańǵarmaı qalady. Sonyń saldarynan qylmystyq jaýapkershilikke tartylýy múmkin, - delingen habarlamada.
Vedomstvo dereginshe, quqyq qorǵaý organdarynyń qyzmetkerleri eshqashan azamattardan qolma-qol aqsha talap etpeıdi. Esh ýaqytta «saqtandyrý» nemese «deklaratsııalaý» úshin aqshany alyp ketpeıdi.
– Beıtanys adamdarǵa aqsha bermeńiz jáne jeke derekterińizdi habarlamańyz. Kúdik týdyratyn qońyraýlar túsken jaǵdaıda, dereý 102 nómirine habarlasyńyz nemese jaqyn mańdaǵy polıtsııa bólimine júginińiz. Óz qaýipsizdigińizdi saqtańyz jáne alaıaqtarǵa aldanbańyz, - dep eskertti polıtseıler.
Eske salsaq, osyǵan deıin Pavlodar oblysynda zeınetkerdi alaıaqtardan qutqarǵan taksı júrgizýshisi marapattalǵany habarlanǵan.