Aqshany qumar oıynǵa jumsaǵan: kópbalaly ana birneshe adamdy aldap, 35,4 mln teńge ıemdengen

ShYMKENT. KAZINFORM — Shymkent qalasynyń soty birneshe ret alaıaqtyq jasaǵan kópbalaly anaǵa qatysty úkim shyǵardy.  Bul týraly Shymkent qalalyq sottyń baspasóz qyzmeti habarlady. 

2025 jyldyń qańtar aıynda Instagram áleýmettik jelisindegi paraqshasy arqyly «ınvestorlar aqshalaı qarajat bergen jaǵdaıda, tender arqyly aqshalaı qarajatty kóbeıtip beretindigi týraly jalǵan aqparattardy jarnamalap, alaıda ol aqshany qumar oıyndarǵa jumsaǵan. 

Jábirlenýshilerge 35 419 000 teńge kóleminde múliktik zalal keltirgen.

Sottalýshynyń kinási is boıynsha jınaqtalǵan qujattarmen dáleldenedi.

Prokýror sottalýshy bas bostandyǵynan aıyrý jazasyn taǵaıyndaýdy surady. Jábirlenýshiler jaza taǵaıyndaý barysynda sottyń qaraýyna qaldyrdy.
Sottalýshy kinásin tolyq moıyndap, istegen is-áreketine shynaıy ókinish bildirip, qatań jaza taǵaıyndamaýdy surady.

Sot, sottalýshynyń qylmystyq jaýapkershilikti jeńildetetin mán-jaılar retinde kinásin tolyq moıyndap, istegen is-áreketine shynaıy ókinish bildirgenin jáne áıeldiń jasóspirim balalarynyń bolýyn eskerdi. Іs boıynsha onyń jaýaptylyǵy men jazasyn aýyrlatatyn mán-jaılarǵa qylmystyń qaıtalanýyn jatqyzdy.

QK-niń 190-baby 3-bóliginiń 4-tarmaǵy boıynsha kináli dep tanyp, oǵan 4 jyl 6 aıǵa bas bostandyǵynan aıyrý jazasy taǵaıyndady.

— Raqymshylyq zańdy qoldaný arqyly túpkilikti jazanyń merzimi úshten bir bóligine qysqartylyp, túpkilikti 4 jyl merzimge bas bostandyǵynan aıyrý jazasy taǵaıyndaldy, 14 jasqa tolmaǵan tórt balasynyń bolýyna baılanysty jazasyn óteýi 5 jyl merzimge qaldyryldy. Іs boıynsha talap aryzdar tolyǵymen qanaǵattandyryldy, — delingen sot habarlamasynda. 

Sot úkimi zańdy kúshine endi.

Aıta ketelik 600 mlrd teńgelik zańsyz qumar oıyn shemasy boıynsha toǵyz adam qamaýǵa alyndy.