Aqshany qaıtarmasańyzdar, sotqa beremiz: Uldana Myrzýannyń anasy qudaǵıymen ne úshin daýlasqanyn aıtty
ASTANA. KAZINFORM – Qyzmettik mindetin atqarý kezinde qaza tapqan feldsher Uldana Myrzýannyń anasy Sálıma Omarova sotta qyzynyń qazasyna baılanysty qandaı da bir materıaldyq kómek kórsetilgeni týraly prokýrorlar suraǵyna jaýap berdi.
Buǵan deıin marqum feldsherdiń kúıeýine Astana ákimdigi men máslıhat depýtatynan 20 mln teńge qarjylaı kómek berilgenin jazǵan edik. S. Omarova osy qarajattyń 4,5 mln teńgesin Ádilet Zeınelden qaryzǵa surap alǵanyn aıtty.
– Aýylda ár apta saıyn beısenbilik ótkizemiz. Soǵan qarajat kerek bolǵandyqtan, úlken qyzym Ádiletten 4,5 mıllıon teńgeni qaryzǵa suraǵan bolatyn. Qyzymnyń nesıesi bar ekeni aıtyldy, ol nesıe alty aıǵa toqtatyldy degen soń, úlken qyzym sol aqshany bere turýdy, keıin alty aıdan soń banktegi nesıeni ózimiz óteıtinimizdi aıtqan. ıAǵnı, Ádilet ózdiginen bergen joq, biz ózimiz surap aldyq, – dedi Sálıma Omarova.
Onyń sózinshe, alty aıdan keıin, mamyr aıynda Ádilet Zeıneldiń anasy qarajatty qaıtarýdy talap etken. Qaıtarylmaǵan jaǵdaıda sot arqyly óndirip alatynyn aıtqan.
– Ádilettiń anasy qyzyma emes, maǵan jazdy. «Eger qaıtarmasańyzdar, sot arqyly óndirip alamyz» dep aıtty, – dedi Uldana Myrzýannyń anasy.
Sálıma Omarova bul qarajattyń aýylda qyzynyń atyna jasalǵan ıgi isterge jumsalǵanyn aıtty. Atap aıtqanda, aýylda beısenbilik ótkizilip, Uldananyń basyna qulpytas qoıylǵan. Sondaı-aq Qurban aıt pen Oraza aıt kezinde sharalar uıymdastyrylyp, qyzynyń rýhyna Quran baǵyshtalǵan.
Bul rette Á. Zeıneldiń qorǵaýshysy M. Máýmetov sotta 4,5 mln teńgeniń qaıda jumsalǵanyn jáne ony rastaıtyn túbirtekterdiń bar-joǵyn surady.
– Aýylda qaladaǵydaı chek bermeıdi. Bárin aýdarym arqyly tóleımiz», – dep jaýap berdi Sálıma Omarova.
Sálıma Omarova bul jaǵdaıǵa deıin Ádilettiń otbasymen qudaǵı retinde syıly qarym-qatynasta bolǵanyn, mundaı jaǵdaıdy múldem qútpegenin jetkizdi.
– Osy ýaqytqa deıin qudaǵı dep syılastyǵymdy bildirip otyrmyn. Ol kisiden mundaıdy kútpedim. Sol kezde aqshany qaıtar degeni janyma qatty batty. «Bul sizdiń de aqshańyz emes, meniń de aqsham emes» dep biraz nárse jazǵanmyn. Onyń jazǵan sózderi de, habarlasqany da bári saqtaýly tur. Kórsete alamyn, – dedi Sálıma Omarova.
Sotta ol Ádilet Zeıneldiń jábirlenýshi retinde tanylǵanyn 2026 jylǵy qańtar nemese aqpan aıynda bilgenin aıtty. Al ózi bul iske jábirlenýshi retinde qatysý múmkindigi týraly sáýir aıynda oılana bastaǵan.
– Sáýir aıynda esimdi jıyp, jan-jaǵyma qaraı bastadym. Oǵan deıin is qozǵalyp jatqanyna habarym bolmady. Ádiletten suraǵanymda, «Bir tekserýdiń qorytyndysy shyqty» degen bir ǵana habardy aıtty. Odan keıin esh jaýap ala almaǵan soń, men de jábirlenýshi bola alamyn ba dep suraı. bastadym, – dedi ol.
Onyń aıtýynsha, bul sheshimniń maqsaty bireýdi kinálaý emes, osyndaı jaǵdaıdyń qaıtalanýyna jol bermeý bolǵan.
Sálıma Omarova qyzy aýrýhanada jatqan kezde ǵımarattaǵy aqaýlar týraly aıtqanyn da eske aldy.
– Aýrýhanada jatqanda kondıtsıoner qulaǵanyn aıtty, keıin qysh qulaǵanyn aıtty. Biraq ol kezde eshteńege mán bermedim, – dedi ol.
Eske salaıyq, Uldana Myrzýan jedel járdem feldsheri bolyp qyzmettik mindetin atqarý kezinde kópqabatty úıdiń qasbeti qulap, qaza tapqan. Osy fakti boıynsha Astana sotynda qylmystyq is qaralyp jatyr.
Buǵan deıin marqum feldsherdiń kúıeýi Á. Zeınel Astana ákimdiginen alǵan 20 mln teńgeni qaıda jumsaǵanyn túsindirgen edi.
