«Aqshańdy eselep qaıtaryp beremin»: Túrkistan oblysynda turǵyndardyń 160 mıllıon teńgesin alǵan alaıaq ustaldy

TÚRKІSTAN. KAZINFORM – Polıtsııa «Aqshańdy eselep qaıtaryp beremin dep, turǵyndarǵa 160 mıllıon teńge shyǵyn keltirgen alaıaqtyń isin sotqa joldady.

«Túrkistan oblysy Polıtsııa departamentiniń «Cyberpol» nysanaly soqqy berý tobynyń qyzmetkerleri jyl boıy qarqyndy jumys júrgizip, profılaktıkany kúsheıtti. Sonyń nátıjesinde 410 qylmystyq is boıynsha tergeý júrgizilip, 200-ge tarta derekke túpkilikti sheshim qabyldandy», - delingen polıtsııa habarlamasynda.

Onyń ishinde kópepızodty qylmystarǵa toqtalar bolsaq, 25 jastaǵy Saıram aýdanynyń turǵyny 50-den astam adamdy aldap, quryǵyna túsirgen. Jas jigit jábirlenýshilerge nesıe resimdetip, «Aqshalaryńyzdy kóbeıtip qaıtaryp, nesıelerińizdi tólep beremiz» dep aldaǵan. Qazirgi ýaqytta qylmystyq is sotqa ótken. Jalpy keltirilgen shyǵyn 160 000 000 teńgeden asady.

Al Shardara aýdanynda 29 jastaǵy er adam 10-ǵa tarta jábirlenýshige ETsP-kilt ashyp beremin degen syltaýmen jeke basyna qatysty málimetterdi alyp, olardyń atynan nesıe resimdegen. 14 500 000 teńge shyǵyn keltirgen is sotqa joldandy.

Sondaı-aq «Cyberpol» qyzmetkerleriniń jedel áreket etýi nátıjesinde jábirlenýshilerdiń 21 000 0O0 teńge qarajaty alaıaqtardyń esepshotyna ótip ketpeı, der kezinde buǵattalyp úlgergen.

Tártip saqshylary oblys kóleminde halyqqa qyzmet kórsetý ortalyǵy, bazar, oıyn-saýyq ortalyqtary men basqa da adamdar kóp shoǵyrlanatyn oryndarda «Internet-alaıaqtyqtan saq bol!» taqyrybynda aýqymdy profılaktıkalyq is-sharalar atqaryldy. Arnaıy ázirlengen 20 000 jadnama taratylyp, 6 000 jabystyrmaly aqparattar ilindi.

Polıtsııa búgingi kúnniń ózekti máselesine aınalyp otyrǵan alaıaqtyq qylmysyna tosqaýyl qoıý maqsatyndaǵy sharalar úzdiksiz júrgiziletinin jetkizdi.

Túrkistan oblysynda polıtsııa saýdagerden 45 keliden astam nasybaı tárkilegenin jazǵan bolatynbyz.