Aqshaly alpaýyt ulynyń toıyna 18 myń jesir áıeldi shaqyrdy
ASTANA. QazAqparat - Úndistanda turatyn Djıtendra Patel atty baı bıznesmen ulynyń úılený toıynda aıdy aspanǵa shyǵardy. a The Times of India habarlaýynsha, shaqyrylǵan qısapsyz qonaqtardyń arasynda 18 myń jesir áıel bolǵan.
Aıta ketý kerek, XIX ǵasyrǵa deıin úndi jerinde jesir áıelderdi órtep jiberý salty saqtaldy. «Satı» dep atalatyn dástúr boıynsha kúıeýi qaıtys bolǵan áıel oǵan ómiriniń sońyna deıin berilgendigin dáleldeý úshin óz-ózderine qol salýy tıis bolǵan. Búginde «satı» salty joıylsa da, munda jesirlerge degen jurttyń kózqarasy túzele qoımaǵan. Jurt olardy toıǵa shaqyrmaq bylaı tursyn, jóndi sóılespeıtin kórinedi. Sondaı-aq olardyń áshekeı buıym taǵyp, shashtaryn ósirýine bolmaıdy. Jesirler aq tústi sarı kııýge mindetti. Bıznesmenniń aıtýynsha, órkenıetti qoǵam mundaı keritartpa pikirlerden aýlaq bolýy tıis. Ol jas jubaılarǵa aınaladaǵylardyń barlyǵy teris aınalǵan tap osy áıelderdiń bata berýin shyn júrekten qup kórgen. «Jesirlerdiń bata berýin jaman yrymǵa jatqyzý - adamnyń sol yrymǵa búkil sanasymen berilip senýinen», deıdi Patel. Bıznesmen jesirlerdi toıǵa shaqyryp ǵana qoımaı, olardy syı-sııapatqa bóledi. Ol eń kedeı 500 áıelge bir-bir saýyndy sıyrdan bergen. Qalǵandaryna jyly kórpe men úıdiń aldyna egýge arnalǵan aǵash shybyqtaryn syılady, dep habarlaıdy 24.kz.
