Aqshaǵa qunyǵyp, ańdardy azaptaǵan Aqtaýdaǵy jyljymaly zoobaqqa tekseris júrgiziledi

AQTAÝ. KAZINFORM – Aqtaýda 1-yqsham aýdanda ornalasqan jyljymaly zoobaqqa qatysty tekseris júrgiziledi. Bul týraly QR Aýyl sharýashylyǵy mınıstrligi Veterınarlyq baqylaý jáne qadaǵalaý komıtetiniń Aqtaý qalalyq aýmaqtyq ınspektsııa málimdedi. Bul týraly Lada.kz saıty jazdy. 

Mamandardyń málimetinshe, tabıǵat qorǵaý prokýratýrasynyń tapsyrmasy men qoǵamdyq uıymdardan túsken ótinish negizinde 2015 jylǵy 29 qazandaǵy № 375-V QRK «Kásipkerlik kodeksiniń» 144-2-baby (Baqylaý jáne qadaǵalaý sýbektisin (obektisin) baryp tekserý arqyly profılaktıkalyq baqylaý) boıynsha quqyqtyq statıstıka organdaryna tıisti tirkeý materıaldary daıyndalyp jatyr.

— Atalǵan uıym bıznes sýbektisi bolǵandyqtan, tekserýdi tirkeý mindetti bolyp tabylady. Tekserý nátıjeleri týraly qosymsha habarlaımyz, — dep málimdedi Aqtaý qalalyq aýmaqtyq ınspektsııasy.

Eske sala keteıik, eriktiler jabaıy janýarlar men qustar óte qolaısyz jaǵdaıda tirshilik etip jatqanyn málimdegen bolatyn. Osydan keıin tabıǵat qorǵaý prokýratýrasy janýarlardy ustaý sharttaryn tekserýdi tapsyrdy.

Eriktilerdiń aıtýynsha, torlar tar ári las, jylytý júıesi joq. Janýarlar óz nájisiniń ústinde jatyp, sol jerde qajettiligin óteýge májbúr. Aınalada sasyq ıis shyǵady, al janýarlardyń júni kir jáne túıdek-túıdek bolyp qalǵan. 

Jaǵa ustatarlyq jaǵdaıda azappen ómir súrip jatqan janýarlardyń taǵdyryna  alańdaýshylyq bildirgen eriktiler, ańdar qyńsylap jatqanyn habarlaǵan. Olardyń paıymynsha, bul janýarlardyń kútim normalaryn óreskel buzylǵanyn kórsetedi. Іshetin sý da, tamaq ta joq. Janýarlar ábden aryqtaǵanyn aıtqan.

– Janýarlardy osyndaı kúıde ákelip, odan tabys tabýdyń qandaı qajeti bar? Bul jaǵdaıǵa tabıǵat qorǵaý prokýratýrasy aralasýy kerek. Kásipkerdiń qyzmetin toqtatyp, janýarlardy dereý alyp ketýi qajet. Bizdiń uıym bul máseleni sheshýge qosymsha aqparat pen kómek kórsetýge daıyn, – dep málimdedi volonterler.

Eske sala keteıik, buǵan deıin Kólsaı kólderinde kúshikterin ertken qar barysy fototuzaqqa túsip qalǵanyn jazǵan edik.