Aqsha jymqyrý isi boıynsha Air Astana burynǵy qyzmetkerlerine sot úkimi shyqty

ALMATY. KAZINFORM — Almaty qalasynyń Almaly aýdandyq sotynda E., I., A.-ǵa qatysty senip tapsyrylǵan aqshalaı qarajatty ıemdený jáne talan-tarajǵa salý, sondaı-aq olardy zańdastyrý faktileri boıynsha qylmystyq is qaraldy.

Almaty sotynyń málimetinshe, áýe kompanııasynda E. men I. menedjer, al A.-nyń departament dırektory bola otyryp, 2019 jyldan 2024 jylǵa deıingi kezeńde aqshalaı qarajatty ıemdengeni anyqtaldy. Urlanǵan qarajatqa jyljymaly jáne jyljymaıtyn múlik satyp alynǵan. Sotta aıyptalýshylar kinálaryn moıyndamady.

Sot úkimi:

I. men A. QR QK 189-baby 4-bóligi 2-tarmaǵy, 218-baby 2-bóligi 1-tarmaǵy, 218-baby 3-bóligi 3-tarmaǵy boıynsha kináli dep tanylyp, múlkin tárkileı otyryp, 8 jyl 6 aı merzimge bas bostandyǵynan aıyrý jazasy taǵaıyndaldy.

Al E. QR QK 189-baby 4-bóligi 2-tarmaǵy, 218-baby 2-bóligi 1-tarmaǵy, 218-baby 3-bóligi 3-tarmaǵy boıynsha kináli dep tanylyp, múlkin tárkileı otyryp, 9 jyl merzimge bas bostandyǵynan aıyrý jazasy taǵaıyndaldy.

Sot úkimi zańdy kúshine engen joq.

Eske salaıyq, buǵan deıin FlyArystan kompanııasynyń burynǵy qyzmetkeri Renat Abýlhanov Air Astana top-menedjerleriniń múddesine áýe bıletterin jeńildikpen satqanyn málimdedi.

Air Astana burynǵy qyzmetkerdiń málimdemesine jaýap berdi.