Aqsha jymqyrǵan «Taza Óskemen» kásiporny basshylarynyń jazasy 7 jylǵa uzartyldy
ÓSKEMEN. KAZINFORM — Shyǵys Qazaqstan oblystyq sotynyń qylmystyq ister jónindegi sot alqasy «Taza Óskemen» kommýnaldyq kásipornynyń burynǵy basshylary men kásipkerge bıýdjet qarajatyn jymqyrý isi boıynsha taǵaıyndalǵan jazany qatańdatty.
Shilde aıynda birinshi satydaǵy sot aıyptalýshylardy alaıaqtyq jasaǵany úshin kináli dep tanyp, kásiporynnyń burynǵy dırektory Ashat Tájenovti 6 jylǵa, onyń orynbasary Ardaq Ábdildınovti 5 jyl 6 aıǵa, al kásipker Igor Fedosovty 5 jylǵa bas bostandyǵynan aıyrǵan bolatyn.
Apellıatsııalyq sot bul úkimniń kúshin joıyp, jańa aıyptaý úkimin shyǵardy. Nátıjesinde úsheýine de 7 jylǵa bas bostandyǵynan aıyrý jazasy taǵaıyndaldy.
Jaza merziminiń ulǵaıýyna aıyptaý babynyń ózgerýi sebep bolǵan. Sot kommýnaldyq memlekettik kásiporynnyń burynǵy basshylarynyń áreketin senip tapsyrylǵan múlikti asa iri mólsherde ıemdenip alý nemese ysyrap etý dep baǵalady. Al kásipker qylmysqa kómektesýshi retinde tanyldy.
— Kásiporyn jyl saıyn qalalyq turǵyn úı-kommýnaldyq sharýashylyq bólimimen Óskemen kósheleri men joldaryn kútip ustaý boıynsha 1,5 mlrd teńgeden astam somaǵa kelisimsharttar jasasqan. Osy jumystar aıasynda basshylar kásipkerdiń baqylaýyndaǵy fırmalarmen toǵyz jalǵan kelisimshart jasasýdy uıymdastyrǵan. Qujattarda qum, jol bıtýmy jáne basqa da materıaldardy jetkizý, sondaı-aq qyzmetter kórsetý qarastyrylǵan. Alaıda taýarlar is júzinde jetkizilmegen, al jumystar oryndalmaǵan. Qarajat shottarǵa aýdarylyp, qolma-qol aqshaǵa aınaldyrylǵan jáne sottalýshylar arasynda bólingen. Jymqyrylǵan qarajattyń jalpy somasy 61,1 mln teńgeni qurady, — dep habarlady ShQO sotynyń baspasóz qyzmetinen.
Aıyptalýshylardyń úsheýi de memlekettik qyzmette jumys isteý quqyǵynan ómir boıyna aıyryldy.
Eske salsaq, osyǵan deıin Qyzylorda oblysynda balabaqsha esepshisi 21,5 mln teńge jymqyrdy degen kúdikke ilingeni habarlanǵan.
