Aqsha talap etken: Ekibastuzda kásiporyn basshysyn qorqytqandar izdestirilip jatyr

PAVLODAR. KAZINFORM - Ekibastuzda belgisiz úsh adam jeke kásiporyn basshysynyń úıine basa-kóktep kirip, aqsha talap etken. Polıtsııa qylmystyq is qozǵap, olardy izdestirip jatyr.

Kúzet uıymyn basqaratyn er adam sol kúni áldebir banktegi esepshotynan iri kólemde aqsha sheship alyp, keıin ony depozıtke salǵan. Al keshkilik onyń úıine tapanshamen jáne pyshaqpen qarýlanǵan úsh adam saý etip kirip kelip, aqsha talap etken.

Polıtsııa oqıǵany rastady.

- Polıtsııa Ekibastuz qalasyndaǵy jeke úıge jasalǵan qaraqshylyqqa qatysy bar adamdardy izdestirý boıynsha sharalar qabyldaýda. Qylmystyq is qozǵaldy. Qazirgi ýaqytta qylmystyń barlyq jaǵdaıy men sebepterin obektıvti zertteýge baǵyttalǵan qajetti tergeý áreketteri júrgizilip jatyr, - dep habarlady óńirlik polıtsııa departamentiniń baspasóz qyzmetinen.

Oqıǵaǵa qatysty qosymsha derekter ázirshe aıtylǵan joq. 

Eske sala keteıik, qaraqshylyq shabýyl jasaǵany úshin izdeýde júrgen er adam Reseıden ekstradıtsııalandy.