Aqsha men qor naryǵynda ósim baıqaldy, teńge turaqtylyǵyn saqtap tur

ASTANA. KAZINFORM — Nvidia kompanııasynyń Intel-ge 5 mlrd dollar kólemindegi ınvestıtsııasy tehnologııalyq sektordaǵy ósimge túrtki boldy, dep jazdy Qazaqstan qarjygerler qaýymdastyǵy. 

Osy jańalyq fonynda Intel aktsııalary 23%-ǵa kóterildi – bul kompanııa tarıhyndaǵy sońǵy 30 jyldan bergi eń joǵary kúndik ósim.

Valıýta naryǵy

USDKZT juby boıynsha kýrs beısenbi kúni aıtarlyqtaı ózgergen joq — 1 dollar 541,28 teńge boldy (+0,15 teńge). Saýda kólemi 232 mln dollarǵa deıin ósti (+29,1 mln).

Bul qozǵalys ishki jáne syrtqy faktorlardyń tepe-teńdigin kórsetedi: qatysýshylar belsendiligi artqanymen, kýrs aıtarlyqtaı ózgermegen.

Teńgege qoldaý kórsetip otyrǵandar:

– iri eksporttaýshylardyń shetel valıýtasyn satýy

– Qarjy mınıstrligi men Ulttyq Banktiń operatsııalary

Al álsiretý faktorlary:

– syrtqy naryqtaǵy belgisizdik

– munaı baǵasynyń qubylýy

– ımporttaýshylardyń jáne syrtqy qaryzdaryn óteıtin kompanııalardyń suranysy

2-toqsandaǵy derekterge sáıkes:

– Halyqtyń ortasha aqshalaı tabysy – 359,6 myń teńge (+8,9% jyldyq ósim)

– Al shyǵyndary – 311,2 myń teńge, ıaǵnı 5,8%-ǵa tómendegen

Bul jınaqtaýǵa degen umtylystyń jáne joǵary paıyzdyq mólsherlemeler men naqty tabystyń (-3,2%) tómendeýi aıasynda saqtyqpen tutyný úrdisiniń artýyn kórsetýi múmkin.

Aqsha naryǵy

Aqsha naryǵy quraldarynyń tabystylyǵy lıkvıdtilik balansynyń ózgerýi saldarynan ósti:

– TONIA mólsherlemesi: 15,59% → 15,63%

– SWAP-1D tabystylyǵy: 10,82% → 11,37%

– Saýda kólemi: 481,1 mlrd teńge (+75,3 mlrd)

Sonymen qatar, Ulttyq Banktiń depozıttik aýktsıonyna suranys tómendedi:

– 941 mlrd teńge (-265 mlrd),

– Tolyq kólemde qanaǵattandyryldy, jyldyq mólsherleme – 16,5%

Ashyq pozıtsııa kólemi – 5,6 trln teńgege deıin azdap ósti

Qor naryǵy

KASE ındeksi 1,3%-ǵa ósip, 7 156,4 pýnktke jetti. Bul – táýekel aktıvter naryǵyna lıkvıdtilik aǵynynyń jalǵasýyn kórsetedi.

Indeksti qoldaǵan aktsııalar:

– Kaspi (+2,7%)

– Qazatomprom (+2,2%)

– QMG (QazMunaıGaz) (+1,9%)

– BTsK (Bank TsentrKredıt) (+1,3%)

– Air Astana (+0,9%)

Indekstegi keri áser:

– Qazaqtelekom (-0,9%)

Baqylaýdan kórgenimiz – shıkizat jáne qarjy sektoryndaǵy «kók chıpterge» suranys basym boldy, al telekom sektorynda – paıdany bekitý baıqaldy.

Korporatıvtik jańalyq:

– BTsK 100 mlrd teńgege 5 jyldyq oblıgatsııalar shyǵarýdy josparlap otyr.

Munaı naryǵy

Munaı baǵasy beısenbi kúni 0,8%-ǵa tómendep, 67,4 dollar/barrel deńgeıinde jabyldy.

Baǵanyń tómendeý sebepteri:

– AQSh ekonomıkasy boıynsha ınvestorlardyń alańdaýshylyǵy

– FRJ (Federaldyq rezerv júıesi) alǵash ret bıyl negizgi mólsherlemeni 0,25 p.p.-ke tómendetti, ári jyl sońyna deıin odan ári tómendetýge daıyn ekenin bildirdi

Qosymsha qysym:

– AQSh-taǵy otynǵa suranystyń álsizdigi

– Usynystyń artýy

Saıası faktorlar:

– AQSh-tyń Reseı munaıy men onyń satyp alýshylaryna qarsy sanktsııalardy keńeıtýi múmkin

– Reseı prezıdenti Pýtın baı azamattar úshin salyqtardy arttyrý múmkindigin málimdedi

– Sondaı-aq, rezervtik qorǵa aýdarylatyn munaı baǵasynyń shekti deńgeıi tómendetilmek

Táýekel aktıvter

AQSh-tyń bırjalyq ındeksteri 0,3–0,9%-ǵa ósti. Buǵan sebep:

– FRJ-nyń saıasatty jumsartý baǵytyn jarııalaýy

– Nvidia-nyń Intel-ge 5 mlrd dollar ınvestıtsııa salýy

Intel aktsııalary bir kúnde 23%-ǵa ósti – bul 30 jyldan astam ýaqyt ishindegi eń úzdik nátıjesi

Nvidia aktsııalary – +3,5%

Eki kompanııa birneshe býyndy birlesken chıp ónimderin ázirlemek, olar data-ortalyqtar men jeke kompıýterlerde qoldanylatyn júktemelerdi jyldamdatýǵa arnalǵan.

Sonymen qatar, chıp óndirýshi basqa kompanııalardyń aktsııalary (mysaly, Arm) qysymǵa ushyrady, óıtkeni ınvestorlar jańa mámileden kim utady, kim utylady – degendi baǵamdaýda.

Qorǵanys aktıvteri

Qaýipsiz aktıvterge suranys azaıdy — paıdany bekitý men FRJ basshysynyń túsiniksiz málimdemeleri sebep boldy:

– Altyn – 1,2%-ǵa tómendep, 3 673 dollar/troı ýntsııa

– AQSh-tyń 10 jyldyq oblıgatsııalarynyń tabystylyǵy – 4,08% → 4,10%

– Dollar ındeksi – +0,5%, 97,4 pýnktke jetti

Aıta keteıik, dollar apta aıaǵynda sál arzandady.