Aqsha-kredıt sharttary ınflıatsııany turaqtandyrýǵa jetkiliksiz bolsa qosymsha sharalar qaralady — Súleımenov

ASTANA. KAZINFORM — Teńge baǵamynyń álsireýimen birge ınflıatsııanyń jedeldeýi aqsha-kredıt sharttaryn aıtarlyqtaı jumsartty. Bul týraly Ulttyq bank tóraǵasy Tımýr Súleımenov aıtty.

— Inflıatsııanyń sońǵy aılardaǵy kórsetkishi ınflıatsııalyq qysymnyń kúsheıgenin ańǵartady. Inflıatsııa boljamnan joǵary qalyptasyp, maqsatty targetke jetý jolyndaǵy turaqty tómendeý traektorııasynan aýytqyp ketti. Teńge baǵamynyń álsireýimen birge ınflıatsııanyń jedeldeýi aqsha-kredıt sharttaryn aıtarlyqtaı jumsartty. Osy jaǵdaılar aqsha-kredıt sharttarynyń qajet bolǵan qalypty qatańdyǵyn qaıta ornyna keltirý jáne eń bastysy, ınflıatsııanyń ósýine jol bermeý úshin bazalyq mólsherlemeni kóterýdi talap etti, — dedi ol.

Tımýr Súleımenovtiń aıtýynsha, Ulttyq bank proınflıatsııalyq jáne dezınflıatsııalyq faktorlar balansyn, ınflıatsııa dınamıkasy men onyń baıaýlaý traektorııasyn jan-jaqty baǵalap otyrady. Qazirgi qatań aqsha-kredıt sharttary ınflıatsııany turaqtandyrýǵa jetkiliksiz bolsa, qosymsha qatańdatý qajettiligi men onyń oryndylyǵy qarastyrylady.

— Baǵaǵa qysym saqtalyp otyr. Oǵan fıskaldyq yntalandyrý, tutynýshylyq kredıtteýden týyndaıtyn turaqty ishki suranys, joǵary ınflıatsııalyq kútýler, tarıfterdiń ósýi men reformalardyń jalǵasýy áser etti. Syrtqy sektorda belgisizdik oryn alyp otyr. Azyq-túliktiń álemdegi baǵasy da joǵary, — dedi UB tóraǵasy.

Buǵan deıin Ulttyq bankiniń Aqsha-kredıt saıasaty komıteti bazalyq mólsherlemeni +/- 1 p. t. dálizimen jyldyq 18 paıyz deńgeıinde belgileý týraly sheshim qabyldaǵan edi.