Aqsha-kredıt saıasatyn jeńildetý ınflıatsııalyq protsesterdi kúsheıtedi – Ulttyq bank

ASTANA. QazAqparat – QR Ulttyq bankiniń tóraǵasy Ǵalymjan Pirmatov Májilis depýtattarynyń saýalyna bergen jaýabynda dál qazir aqsha-kredıt saıasatyn jeńildetý nege orynsyz dep topshylaǵandaryn túsindirdi, dep habarlaıdy QazAqparat tilshisi.

«Aǵymdaǵy jaǵdaılarda aqsha-kredıt saıasatyn jeńildetý orynsyz», - dep jazdy ol jaýabynda.

Onyń paıymynsha, ekonomıkanyń ósýine yqpal etetin qysqa merzimdi oń qubylystar baıqalǵanymen, uzaq merzimdi ólshemde onyń teris saldary bolýy múmkin. Bul ásirese teńge baǵamynyń quldyraı túsýine túrtki bolatyn kórinedi.

«Joǵary ınflıatsııamen salystyrǵanda aqsha naryǵyndaǵy teńgedegi aktıvterdiń negizsiz tómen kiristiligi qarjy naryǵynyń kásibı qatysýshylarynda da, halyq arasynda da valıýtalyq artyqshylyqtardyń ózgerýine sebep bolady. Bul óz kezeginde, devalvatsııalyq kútýlerdiń ósýine jáne teńgeniń álsireýine ákep soǵady. Saldarynan dollarlandyrý protsesi qaıta bastalyp, ınflıatsııalyq protsester kúsheıe túsedi. Sonymen qatar teńgelik depozıtterden qarajattyń ketýi saldarynan bank júıesiniń resýrstyq bazasy tómendeıdi. Bul qarjylyq turaqtylyqty qamtamasyz etý bóliginde táýekelderdi aıtarlyqtaı arttyrady», - dedi Ulttyq bank basshysy.

Ǵalymjan Pirmatovtyń aıtýyna qaraǵanda qazirgi jaǵdaıda aqsha-nesıe saıasatyn jeńildetý ekonomıkadaǵy tutyný shyǵyndarynyń artýyna ǵana ákelýi múmkin.

«Ekonomıka sýbektileriniń qalaýlary tutyný jaǵyna qaraı aýysatyn bolady. Joǵary tutyný suranysy ınflıatsııalyq protsesterdi odan ári jedeldetedi jáne saıyp kelgende halyqtyń naqty tabysyn tómendetedi», - dep jazylǵan jaýapta.