Aqsha qozǵalysynyń barlyq tizbegin kóremiz — Antıkor basshysy «boıalǵan» teńgeniń alǵashqy nátıjesi jaıly
ASTANA. KAZINFORM — Sybaılas jemqorlyqqa qarsy is-qımyl agenttiginiń tóraǵasy Ashat Jumaǵalı Jibek Joly telearnasynyń «Ýáde» baǵdarlamasyna bergen eksklıýzıvti suhbatynda elimizdegi tsıfrlyq «boıalǵan» aqsha jobasynyń alǵashqy nátıjesi jaıly aıtyp berdi.
«Boıalǵan» aqsha degenimiz ne?
Bul — tańbalanatyn jáne bıýdjetten bólingennen bastap sońǵy alýǵa deıingi onyń paıdalaný barlyq joly qadaǵalaýda bolatyn tsıfrlyq teńge. Qarajatty tek belgili bir naqty maqsatqa ǵana paıdalanýǵa bolady. Al árbir tranzaktsııa anyq. Taýarlar nemese qyzmetterdiń satyp alynǵany rastalǵan kezde tsıfrlyq teńge kádimge aqshaǵa aınaldyrylyp, tólem júzege asyrylady.
— Prezıdent tapsyrmasymen quraldy engizýdi bastaǵan kezde oǵan Ulttyq bankti tarttyq. Óıtkeni, onyń platformasynda júzege asyrylady jáne ol tsıfrlyq teńgeniń avtory sanalady. Qarjy mınıstrligin de mindetti túrde jumyldyrdyq. Sebebi, olar bıýdjet aqshasynyń qozǵalysyna jaýap beredi. Atalǵan bıýdjet qarajatyn jaratatyn ókiletti organdar da bar, — dedi Sybaılas jemqorlyqqa qarsy is-qımyl agenttiginiń tóraǵasy.
Іs júzinde ol qalaı jumys isteıdi?
Júıe «Dostyq-Moıynty» temir joly qurylysy aıasynda alǵashqy synaqtan ótti. Tsıfrlyq platforma arqyly 164 mlrd teńge aýdaryldy.
— Ótken jyly ilki jobany iske qostyq. Bul — «Dostyq-Moıynty» temir jolynyń qurylysy. Ol jaqta qazirdiń ózinde shamamen 160 mlrd teńge tsıfrlyq platforma arqyly, tsıfrlyq «boıalǵan» teńge arqyly tústi. Biz atalǵan qarajat qozǵalysynyń barlyq tizbegin kóremiz, — dep atap ótti Ashat Jumaǵalı.
Júıe ilki rejımde Atyraý oblysyndaǵy «Muqyr-Qulsary» avtomobıl jóndeý barysynda da qoldanylyp jatyr. Onda 100 mln teńge materıaldardy satyp alý kezinde kádege jaratylǵan.
Júıeniń qandaı basymdyǵy bar?
Ashat Jumaǵalıdyń aıtýynsha, tsıfrlyq «boıalǵan» teńge bıýdjet qarajatyn urlaý syzbasyn kúrdelendiredi. Burynyraq aqshany jalǵan mámileler arqyly engizip, qolma-qol aqshaǵa aınaldyryp alýǵa bolatyn. Al endigi ýaqytta mundaı aıla múmkin emes. Sebebi árbir tranzaktsııa tirkelip, saraptama jasalady.
Aldaǵy jyly jol salasy bıýdjetin qalyptastyrýdan bastap, onyń oryndalýyn baqylaýǵa deıingi barlyq kezeńi tolyǵymen tsıfrlyq quralǵa kóshirilmek. Keleshekte derekter bazasy men baǵalardy jáne jumys kólemin avtomatty saralaýdy yqpaldastyrýdyń arqasynda protsess munan da ashyq bola túsip, jemqorlyqtan qorǵalady.
Bul júıeni engizý — Qazaqstanda bıýdjet qarajatyn tıimdi jáne ádil paıdalanýdy arttyrýǵa baǵyttalǵan mańyzdy qadamdardyń biri.
Buǵan deıin Prezıdent Qasym-Jomart Toqaev Úkimettiń keńeıtilgen otyrysynda qurylys salasyna aqshaǵa tsıfrlyq teńge arqyly en salý jobasyn engizýdi tapsyrǵanyn jazǵan edik.