«Aqsha qajet, al qazaq tili kerek emes» deıtinderdi qalaı túsinemiz?» - respýblıkalyq basylymdarǵa sholý
***
Keshe Memleket basshysy Nursultan Nazarbaev Batys Qazaqstan oblysynda saparmen boldy. Onda kóktemgi sý tasqyny saldarynan zardap shekken turǵyndarmen kezdesip, sóz sóıledi. Sondaı-aq óńirdegi birqatar áleýmettik nysandarmen tanysty. Osyǵan oraı «Egemen Qazaqstan» gazetinde Elbasynyń jumys sapary jaıynda jazylǵan kólemdi maqala «Aqjaıyq adymdary» degen taqyryppen berildi. Basylymnyń atap ótýinshe, Qazaqstan basshysy Aqjaıyqqa saparynyń qorytyndysy boıynsha munda táýelsizdik tusynda qol jetken tabystarǵa oń baǵa berdi. «Iá, Aqjaıyqtyń búgingi adymdary taıǵa tańba basqandaı anyq, bederli ári arshyndy ekeni talas týǵyzbaıdy. Táýelsizdiktiń topshysy odan ári bekı túsýine batysqazaqstandyqtardyń qosqan úlesi táýelsizdiktiń erteńgi tarıhynan oryn alary anyq. Elbasynyń Batys Qazaqstan oblysyna saparynyń taǵy bir túıini osyndaı oıǵa jeteledi», - dep jazady basylym.
«Egemen Qazaqstan» gazetiniń jazýynsha, keshe Qazaqstan Prezıdenti janyndaǵy Adam quqyqtary jónindegi komıssııanyń «2010 jyly Qazaqstan Respýblıkasyndaǵy adam quqyqtarynyń ahýaly týraly» baıandamasynyń halyqaralyq tusaýkeseri bolyp ótti. Buǵan deıin baıandama halyqaralyq jáne otandyq sarapshylardyń oń baǵasyn alǵan bolatyn. Osy rette adam quqyqtary jónindegi baıandama Ulybrıtanııanyń Qazaqstandaǵy jáne Qyrǵyzstandaǵy elshilikteriniń, EQYU Astanadaǵy ortalyǵynyń tehnıkalyq kómegi arqasynda qazaq, orys jáne aǵylshyn tilderinde basylyp shyqty.
***
Keshe Mádenıet mınıstri Muhtar Qul-Muhammed arqalap kelgen memlekettik áleýmettik tapsyrys máselelerine qatysty zań jobasyn Parlament Májilisiniń depýtattary maquldady. Osyǵan oraı «Alash aınasy» gazetinde «Aqsha qajet, al qazaq tili kerek emes» deıtinderdi qalaı túsinemiz?» degen taqyryppen maqala jarııalandy. «Osyǵan deıin talaı qyzý talqyǵa túsken zań jobasy ábden pisip-jetilgen eken. Aıryqsha atap ótetin dúnıe - zań jobasy memlekettik áleýmettik tapsyrys alý úshin konkýrsqa qatysatyn úkimettik emes uıymdarǵa konkýrstyq qujattardy qazaq jáne orys tilderinde rásimdeýdi mindetteıdi. Umytpasaq, zań jobasyna bul ózgertýdi Parlament Májilisiniń depýtaty Murat Ábenov engizgen bolatyn. Alaıda keshegi plenarlyq otyrysta Parlament Májilisiniń depýtaty, burymdy Baqyt Syzdyqova óziniń kúmándi suraǵymen «zańnyń bul talabyna ishteı narazy depýtattar da bar eken-aý» degen oı týǵyzdy», - dep jazady basylym.
«Álıhan degende eleń eter mınıstrlerdiń tabylmaǵany ma bul?». «Alash aınasy» gazetinde osyndaı taqyryppen jaryq kórgen maqalaǵa elordadaǵy Táýelsizdik saraıynda ótken Álıhan Bókeıhannyń 145 jyldyǵyna arnalǵan «Alash muraty jáne táýelsiz Qazaqstan» atty halyqaralyq ǵylymı-tájirıbelik konferentsııa arqaý bolǵan. «Ókinishtisi sol - ataýly konferentsııadan birde-bir mınıstrdi kórmedik. «Álıhan Bókeıhanov maǵan qatysy joq» deıtindeı tulǵa ma edi? Qazaq ekonomıkasyna sińirgen eńbegin eskerip, ekonomıka jáne saýda mınıstri men qarjy mınıstri kelýge bolatyn edi ǵoı», - dep ashyna jazady basylym.
***
«Aıqyn» gazeti óziniń keshegi sanynda kúres túrleri boıynsha Túrkııanyń Ystambul qalasynda ótip jatan álem chempıonatynyń alǵashqy kúni jerlesterimiz úshin sátsiz aıaqtalǵany jaıynda oqyrmandaryn qulaǵdar etken bolatyn. Al búgingi nómirinde súıinshi habar jarııalapty. Basylymnyń atap ótýinshe, eki balýanymyz, atap aıtqanda Almat Kebisbaev kúmis, Nurmahan Tinálıev qola medalǵa ıe bolǵan. Basqa da sport jańalyqtarynan egjeı-tegjeıli maǵlumat alǵyńyz kelse, «Aıqyn» gazetiniń beısenbilik sanyna kóz júgirtińiz.
***
«Keshe Aqordada Qazaqstan Respýblıkasynyń Memlekettik hatshysy Qanat Saýdabaevtyń tóraǵalyq etýimen Qazaqstan Respýblıkasynyń Prezıdenti janyndaǵy Sybaılas jemqorlyqqa qarsy kúres máseleleri jónindegi komıssııanyń otyrysy bolyp ótti», - dep jazady «Kazahstanskaıa pravda» gazeti. Basylymnyń atap ótýinshe, otyrysta memlekettik organdardyń kóshi-qon zańnamasyn qoldaný jónindegi qyzmetine prokýratýra organdarynyń júrgizgen tekserý nátıjeleri men Aqmola jáne Almaty oblystary ákimdikteriniń sybaılas jemqorlyqqa qarsy kúrestiń aımaqtyq máselelerin iske asyrýda qabyldap jatqan sharalary boıynsha Bas prokýrordyń birinshi orynbasary I.Merkeldiń, Іshki ister mınıstri Q.Qasymovtyń, sondaı-aq atalǵan oblystardyń ákimderi S.Dıachenko men A.Musahanovtyń baıandamalary tyńdaldy.
