Anonımdi saýalnama nátıjeleri selt etkizdi — Zákıeva Almaty oblysy mektepteri týraly

ASTANA. KAZINFORM – Bala quqyqtary jónindegi ýákil Dınara Zákıeva Almaty oblysyndaǵy mektepterde anonımdi saýalnama júrgizilgeni týraly jazdy. 

— Memleket basshysy tapsyrmasynyń aıasynda osy aıda biz memlekettik organdar, Balalar quqyqtaryn qorǵaý komıtetimen birge Almaty oblysynyń 7 aýdanyndaǵy mektepterdegi jaǵdaıǵa iriktemeli tekseris júrgizdik. Ókinishke qaraı, Almaty oblysy Іle aýdanynda oqýshynyń basqa balalarǵa qatysty jasaǵan zorlyq-zombylyǵy — oblys mektepterindegi úlken júıeli problemanyń bir kórinisi. Oblys oqýshylarynyń arasynda anonımdi saýalnama júrgizdik, sondaı-aq olardyń anketalaryn zerttedik. Nátıjeleri bizdi selt etkizdi. Qarasaı, Balqash, Talǵar, Іle, Eńbekshiqazaq aýdandarynyń mektepterinde balalar aqsha bopsalaý, tamaq tartyp alý, býllıng, zorlyq-zombylyq, sonymen qatar muǵalimder tarapynan, dene shynyqtyrý jáne algebra páni muǵalimderiniń tıisýi týraly jazǵan. Eńbekshiqazaq aýdanynda eki bala muǵalimderdiń kúsh qoldanýynan keıin aýrýhanaǵa túsken, — dedi Bala quqyqtary jónindegi ýákil.

Ol kishi synyp oqýshylary joǵary synyp oqýshylaryna aqsha jınaǵan oqıǵalar týraly da jazdy. 

— Sondaı-aq Jambyl aýdanynyń bir mektebinde balalar kelesi qorqynyshty kórinisti sıpattaǵan. Kishi synyp oqýshylary joǵary synyp oqýshylaryn kórgende qoldaryn aqsha berý úshin birden qaltalaryna salady eken, áıtpese olarǵa kúsh qoldanylady deıdi. Balalar besinshi synyp oqýshysyn top bolyp urý, nasybaı qoldaný (ol keıde jerde jatady dep jazǵan) týraly da jazǵan, — dedi Dınara Zákıeva.

 Onyń aıtýynsha mektep ákimshiligi oqýshylar arasyndaǵy jaǵdaıdy bilmeıdi nemese elemeıdi.

— Sonymen qatar olar oqýshylarǵa qatysty kıberbýllıngti jarııalaıtyn anonımdi Instagram-arna týraly habarlap, bul týraly muǵalimderge aıtqandarymen, eshqandaı kómek almaǵan. Odan bólek, balalar kúzde keminde 50 oqýshy qatysqan jappaı tóbeles bolǵanyn aıtty, biraq mektep bul faktini joqqa shyǵaryp otyr, al polıtsııa mundaı aqparattan beıhabar eken. Osylaısha, mektepterde oqýshylar arasyndaǵy quqyqbuzýshylyqtardy mektep basshylyǵy men qyzmetkerleriniń jasyrýy, balalarmen profılaktıkalyq jáne jeke jumystyń joqtyǵy baıqalady. Mektep ákimshiligi oqýshylar arasyndaǵy jaǵdaıdy bilmeıdi nemese elemeıdi, jasyrady jáne polıtsııaǵa habarlamaıdy. Budan bólek, kóptegen jaǵdaıda mektepterdiń ózderi anketada býllıng, aqsha bopsalaý jáne ózge de quqyqqa qaıshy áreketter boıynsha rastaýshy jaýaptar berilgenine qaramastan, qorytyndy anyqtamada bundaı jaǵdaılardy 0% dep kórsetken. Sonymen qatar, oblysta tárbıe baǵdarlamalaryn jáne qabyldanǵan zań normalaryn iske asyrý deńgeıi tómen ekenin atap ótken jón. Atalǵan faktilerdiń bárin biz oblys basshylyǵy, polıtsııa jáne ózge basqarmalarmen ótken qorytyndy jınalysta jarııa ettik. Sondaı-aq, biz oblysqa jáne ýákiletti memlekettik organdarǵa joldanatyn anyqtama daıyndadyq, — dep jazdy ýákil.

Aıta ketelik Almaty oblysynda bir adamdy jabylyp urǵan kúdiktiler izdestirilip jatqany týraly jazǵan edik.