Aqsha bopsalaý: Shymkentte bloger men úsh sybaılasy qamaýǵa alyndy
ASTANA. KAZINFORM — Shymkent qalasy polıtsııa departamentiniń uıymdasqan qylmysqa qarsy kúres basqarmasynyń qyzmetkerleri áleýmettik jelilerde bedelge nuqsan keltiretin beınematerıaldardy jarııalaımyn dep qorqytyp, azamattardan aqsha bopsalaýmen aınalysqan toptyń zańsyz áreketin toqtatty. Bul týraly ІІM málim etti.
— Jedel is-sharalar barysynda Instagram jelisinde 150 myńǵa jýyq oqyrmany bar jergilikti blogerdiń úsh sybaılasymen birge kásipkerler men memlekettik qyzmetshilerdi ádeıi beınetaspaǵa túsirip júrgeni anyqtaldy, — delingen habarlamada.
Olar qyzmettik mindetterin atqarý barysynda tártip buzdy dep, sondaı-aq kásipkerlik qyzmetke qatysty bolýy múmkin zań buzýshylyqtardy syltaý etip, túrli beınematerıaldar jınaǵan.
— Keıin sol beınejazbalardy áleýmettik jelige jarııalamaý úshin azamattardan aqsha talap etken, — dep habarlady Іshki ister organdarynan.
Kúdiktiler ustalyp, qamaýǵa alyndy. Qazirgi ýaqytta tergeý áreketteri júrgizilip jatyr.
Eske sala keteıik, Shymkentte bloger ári jýrnalıst bopsalaý isi boıynsha 5 jylǵa sottalǵan bolatyn.
