Aqsha bermeseń ıntım vıdeońdy taratamyz: Tarazda 24 jastaǵy jigitti bopsalaǵandar ustaldy

TARAZ. QazAqparat - Jambyl oblysynda ıntımdik sıpattaǵy beınejazbany taratpaý úshin aqsha bopsalaǵan kúdiktiler ustaldy, dep habarlaıdy Polisia.kz.

Taraz qalasynyń polıtsııa bólimine bopsalaý deregi týraly oblys ortalyǵynyń 24 jastaǵy turǵyny shaǵymdandy.

Jas jigit keıbir adamdar bopsalaý jáne qoqan-loqqy kórsetý arqyly ıntımdik sıpattaǵy beınejazbany taratpaý úshin onyń 990 myń teńge kólemindegi aqshasyn ıemdengenin aıtty.

Osy derekke qatysty QR QK 94-baby 2-bóligi boıynsha sotqa deıingi tergeý amaldary bastaldy.

Jedel-izdestirý sharalary kezinde Jambyl oblysynyń polıtsııa departamenti uıymdasqan qylmysqa qarsy kúres basqarmasynyń qyzmetkerleri «Arlan» arnaıy maqsattaǵy bólinisimen birlesip 29, 28, 24 jáne 19 jastaǵy tórt azamatty anyqtap, ustady.

Ustalǵandar óz kinásin tolyq moıyndady.

24 pen 29 jas aralyǵyndaǵy kúdiktiler Taraz qalasynyń ýaqytsha ustaý ızolıatoryna qamaldy.

Eki kúdikti qolhatpen bosatyldy.

Ustalǵandardyń biriniń buryn qylmystyq jaýapkershilikke tartylǵany anyqtaldy.

Qazirgi ýaqytta istiń tolyq mán-jaılaryn anyqtaý úshin barlyq qajetti jedel-tergeý is-sharalary júrgizilip jatyr.