AQSh Joǵarǵy soty Venesýeladan kelgen mıgranttardy deportatsııalaýdy ýaqytsha toqtatty

ASTANA. KAZINFORM —   Bul sheshim azamattyq bostandyqtardy qorǵaý odaǵynyń ótinishi negizinde qabyldandy, dep jazdy Anadoly.

AQSh Joǵarǵy soty Venesýeladan kelgen mıgranttardy deportatsııalaýdy ýaqytsha shegerip qoıdy. Bul mıgranttardy AQSh-tyń burynǵy prezıdenti Donald Tramptyń ákimshiligi «Sheteldik jaýlar týraly zańǵa» súıene otyryp elden shyǵarmaq bolǵan.

Washington Post basylymynyń habarlaýynsha, Amerıkalyq azamattyq bostandyqtardy qorǵaý odaǵy (ACLU) Joǵarǵy sotqa júginip, keminde 30 venesýelalyqty deportatsııalaý áreketin toqtatýdy suraǵan.

Sot sheshiminde: «Atalǵan topqa jatatyn, qamaýda otyrǵan birde-bir adam sottyń kelesi buıryǵyna deıin AQSh-tan shyǵarylmaıdy», – dep kórsetilgen.

Bandalardy deportatsııalaý

Tramp ákimshiligi Latyn Amerıkasyndaǵy eń qaýipti qylmystyq toptar qataryna jatatyn «MS-13» pen Venesýelanyń «Tren de Aragua» bandalaryn «sheteldik terrorıstik uıymdar» tizimine engizip, olardyń keıbir múshelerin Salvadorǵa deportatsııalaǵan.

AQSh prezıdenti Donald Tramp zańsyz mıgratsııamen kúresý aıasynda buryn tek soǵys jaǵdaıynda qoldanylǵan «Sheteldik jaýlar týraly zańdy» iske qosty.

Eske sala keteıik, buǵan deıin Tramp elden erikti túrde ketkisi keletin zańsyz mıgranttarǵa qarjylaı kómek pen ushaq bıletin usynǵanyn jazǵan bolatynbyz.