AQSh Joǵarǵy soty Tramptyń jazýshy Kerrollǵa ótemaqy tóleýdi toqtatý týraly ótinishin taǵy da qaıtardy
ASTANA. KAZINFORM - Dúısenbi kúni Joǵarǵy sot ekinshi ret AQSh prezıdentiniń alqabıler úkimin joıý týraly ótinishin qabyldamady. Bul úkimge sáıkes, jazýshy Djın Kerroll qyryndaý jáne jala jabý isi boıynsha 5 mıllıon dollar kóleminde ótemaqy alǵan, dep habarlaıdy Kazinform agenttiginiń Vashıngtondaǵy menshikti tilshisi NBC News-ke silteme jasap.
Prezıdent tosyn qadamǵa baryp, sottan maýsym aıyndaǵy sheshimin qaıta qaraýdy surady, ol kezde Tramptyń bastapqy shaǵymy qanaǵattandyrylmaǵan bolatyn. Sot kóp jaǵdaıda mundaı ótinishterdi qanaǵattandyrmaıdy.
Tramp búginge deıin $5 mln-dy paıyzymen qosa tólep qoıǵan.
Bul is Nıý-Iorkte amerıkalyq jazýshy áıel Djın Kerrolldyń ony Tramp 1996 jyly ámbebap dúkenniń kıim ólsheıtin bólmesinde zorlady dep jazǵan federaldyq aryzyna baılanysty qozǵalǵan bolatyn. Tramp óziniń birinshi prezıdenttik merzimi bitkennen keıin jazýshyǵa jala jabý týraly shaǵym túsirip, onyń aıyptaýlaryn «alaıaqtyq» jáne «quralǵan ańyz» dep ataǵan bolatyn.
2023 jyly alqabıler Trampty seksýaldy sıpattaǵy qysym kórsetýge qatysty shaǵym boıynsha kináli dep taýyp, jazýshy áıelge $5 mln mólsherinde ótemaqy tóleýge mindettedi.
Soǵan qosa 2024 jyly qańtar aıynda alqabıler soty jazýshyǵa til tıgizgeni úshin Trampqa $83,3 mln mólsherinde aıyppul saldy.
Tramp qandaı da bir quqyqbuzýshylyqqa jol bergenin joqqa shyǵardy jáne Kerroldy tanymaıtynyn málimdedi.
Buǵan deıin AQSh sottary Tramp ákimshiliginiń Garvardqa qarsy jáne poshta arqyly daýys berý týraly aryzyn qanaǵattandyrmaǵan bolatyn.
