AQSh Joǵarǵy soty Tramptyń keıbir álemdik tarıfin zańsyz dep tanydy

ASTANA. KAZINFORM — AQSh Joǵarǵy soty Tramptyń ımporttyq taýarlarǵa salǵan tarıfterin zańsyz dep tanydy jáne onyń ókilettikti asyra paıdalanǵanyn kórsetti, dep habarlaıdy BBC.

Sot sheshimi boıynsha Tramptyń tarıfteri 6 daýysqa qarsy 3 daýysymen kúshin joǵaltty. Tarıfterdi joıýǵa úsh lıberaldyq sýdıa — Ketandjı Braýn Djekson, Elena Kagan jáne Sonıa Sotomaıor, sondaı-aq úsh konservatıvtik sýdıa — Emı Konı Barrett, Nıl Gorsach jáne Djon Roberts daýys berdi.

Sýdıalar — Brett Kavano, Semıýel Alıto jáne Klarens Tomas qarsy daýys berdi.

Sheshimde Tramp 1977 jylǵy «Halyqaralyq tótenshe ekonomıkalyq ókilettilik týraly zań» (IEEPA) negizinde engizgen masshtabty tarıfterin zańsyz dep tanydy. Bul zań prezıdentke tek eldegi tótenshe jaǵdaılarǵa jaýap retinde saýdany retteýge múmkindik beredi. Joǵarǵy sot «Zań prezıdentke tarıfter engizýge ókilettik bermeıdi» dep túıindedi.

Tramp bul zańdy alǵash ret 2025 jylǵy aqpanda Qytaı, Meksıka jáne Kanadadan keletin taýarlarǵa salyq salý úshin qoldanǵan, sebebi sol elderden esirtki tasymaldaý «tótenshe jaǵdaı» dep tanylǵan.

Sáýirde ol bul zańdy qaıta qoldandy da, álemniń derlik ár elinen keletin taýarlarǵa 10%-dan 50%-ǵa deıingi tarıfter engizdi. Ol AQSh-taǵy saýda tapshylyǵy – ımport eksportan kóp bolǵan jaǵdaı – «ótkir jáne erekshe qaýip» ekenin alǵa tartty.

Degenmen, Joǵarǵy sot sheshimi 1962 jylǵy «Saýdany keńeıtý týraly zań» boıynsha ulttyq qaýipsizdik maqsatynda engizilgen bolat, alıýmınıı, pılomaterıaldar jáne avtokólikterge salynǵan salalyq tarıfterge áser etpeıdi.

— AQSh prezıdenti Donald Tramp búgingi sheshimge resmı túrde pikir bildirmegen, biraq buryn «jeńilse, eldiń quldyraıtynyn» aıtqan bolatyn, — delingen habarlamada.

Buǵan deıin Tramptyń Kanadaǵa salǵan tarıfteri Kongreste joıylǵany habarlanǵan.