AQSh jazýshysy Jeff Kınnıdiń balalarǵa arnalǵan «Wimpy Kid» kitaby qazaq tilinde jaryq kórdi

ALMATY. QazAqparat – Álemniń jetpiske jýyq tiline aýdarylǵan, balalarǵa arnalǵan eń ataqty komıks-romandardyń biri «Tentek balaqaıdyń kúndeligi» («Wimpy Kid») qazaq tilinde jaryq kórdi, dep habarlaıdy QazAqparat tilshisi.

AQSh jazýshysy, sýretshi Jeff Kınnı jazǵan bul kitapty qazaqstandyq «Steppe & WORLD Publishing» baspasy shyǵardy.

Baspa ókilderiniń aıtýynsha, kitapty qazaq jáne aǵylshyn tilderinde oqýǵa bolady, ıaǵnı bir basylymda eki tildegi nusqa qatar berilip otyr.

«Balalar planshet pen telefonnan aırylmaıdy, kitaptan qashady. Sonyń kesirinen boıynda psıhologııalyq teris ózgerister bolyp jatady. Muny qumarlyqqa teńer edim. Kóp ata-ana balalaryna kitap oqýdyń paıdasyn túsindire almaı qınalady. «Tentek balaqaıdyń kúndeligi» komıks-romany osyndaıda jaqsy kómekshi bolmaq. Bul eńbekti balalar súısinip oqıdy jáne basqa kitapty oqýǵa degen qulshynys paıda bolady. Al túpnusqa mátinniń qatar berilýi aǵylshyn tilin jaqsartady», - deıdi baspa basshysy Raısa Qadir.

Sonymen qatar, ol kitap avtory Jeff Kınnı Qazaqstanǵa kelýge nıetti ekenin aıtty.

«Aldaǵy ýaqytta avtordy arnaıy shaqyryp, oqyrmandarǵa erekshe kesh syılaımyz dep úmittenemin», - deıdi baspa basshysy.

«Tentek balaqaıdyń kúndeligin» qazaq tiline aýdarǵan – Nárkez Berikqazy. Redaktory – Nazgúl Qojabek.

Kitaptyń bas keıipkeri – qarapaıym oqýshy Greg Hefflı. Ol basynan ótken alýan túrli qyzyq oqıǵany kúndelik retinde jazyp júredi. Gregtiń sýrettegenin oqyǵan ár bala ózin tanıdy, sabaq alady.

«Mátini jeńil, sýretteri tartymdy, keıipkerlerinen balalyq ańǵaldyq pen tazalyq lebi esip turǵan kitapta ár oqýshynyń basynan ótetin, ata-anamen, muǵalimdermen, synyptastarmen aradaǵy qatynas, jaqsy men jamannyń baıybyna barý, bardy bar, joqty joq dep túsiný evolıýtsııasy sıpattalǵan», - deıdi Raısa Qadir.