AQSh jańa vızalyq shekteýler engizip jatyr
ASTANA. KAZINFORM — AQSh kıberqylmys, onlaın alaıaqtyq jáne tsıfrlyq tehnologııalardy paıdalaný arqyly jasalatyn qylmystarmen kúresý úshin vızalyq shekteýlerdiń jańa jahandyq saıasaty týraly jarııalady, dep habarlaıdy AQSh Memlekettik departamenti.
Saıasat kıbershabýyldar, onlaın alaıaqtyq, seksýaldyq bopsalaý jáne amerıkalyq azamattarǵa zııan keltiretin basqa da qylmystyq shemalarǵa qatysatyn tulǵalarǵa qarsy baǵyttalǵan.
Shekteýler AQSh-tyń Immıgratsııa jáne azamattyq týraly zańynyń 212(a) (3)© bólimine sáıkes qoldanylady. Jekelegen jaǵdaılarda vızalyq shekteýler osyndaı zańsyz áreketke qatysy bar adamdardyń otbasy múshelerine de áser etýi múmkin.
AQSh ákimshiligi qylmystyq jelilerdi joıý úshin sanktsııalar, qylmystyq ister, aktıvterge tyıym salý, ekstradıtsııalaý jáne quqyq qorǵaý organdarynyń halyqaralyq yntymaqtastyǵy sııaqty qosymsha quraldardy qoldanatynyn málimdedi.
Saıasattyń negizgi maqsaty — kıberqylmys pen alaıaqtyqtan paıda tabatyn tulǵalardyń AQSh-qa kirýin shekteý, sondaı-aq halyqaralyq qylmystyq uıymdarǵa qysymdy kúsheıtý.
Memlekettik departamenttiń habarlaýynsha, Qytaıdyń transulttyq qylmystyq uıymdarynyń tapsyrysy boıynsha jıi áreket etip júrgen alaıaqtar tek 2024 jyly AQSh azamattaryn kem degende 10 mlrd dollarǵa aldap, osylaısha sybaılas jemqorlyq, aqshany jylystatý jáne adam saýdasyna yqpal etken.
Osyǵan deıin Eýropalyq odaq pen Qazaqstan arasyndaǵy vızalyq rásimderdi jeńildetý jáne readmıssııa týraly kelisim boıynsha kelissózder aıaqtalǵanyn jazdyq.
