AQSh zańsyz mıgranttardy deportatsııalaý úshin memlekettik áýe kompanııasyn qurmaq
ASTANA. KAZINFORM — AQSh-tyń Іshki qaýipsizdik mınıstrligi zańsyz mıgranttardy deportatsııalaý, shetel azamattarynyń óz erkimen eline oralýyn uıymdastyrý, medıtsınalyq evakýatsııa jáne tótenshe jaǵdaılar kezinde arnaıy reısterdi oryndaý úshin memlekettik áýe tobyn qurýdy josparlap otyr.
Bloomberg málimetinshe, vedomstvo qazir áýe parkin basqaratyn, ekıpajdarmen, tehnıkalyq qyzmet kórsetýmen, medıtsınalyq personalmen qamtamasyz etetin ári táýlik boıy úzdiksiz jumysyn uıymdastyratyn merdiger izdep jatyr.
Talapqa sáıkes, jańa áýe tobynyń quramynda jeti Boeing 737-700 nemese soǵan uqsas ushaq, sondaı-aq eki alys qashyqtyqqa ushatyn Gulfstream G650ER/C-37B bıznes-djeti bolýǵa tıis.
Qazirgi ýaqytta AQSh-tyń Immıgratsııa jáne kedendik baqylaý qyzmeti (ICE) negizinen jekemenshik áýe kompanııalarynyń charterlik reısterin paıdalanady. Al jańa qurylym ishki jáne halyqaralyq reısterdi úshinshi tarap tasymaldaýshylaryna júginbeı-aq oryndaýǵa múmkindik beredi.
Іshki qaýipsizdik mınıstrligi buǵan deıin jeke áýe parkiniń qurylýy deportatsııalaý rásimin jedeldetip, federaldyq bıýdjetke jyl saıyn 279 mıllıon dollarǵa deıin únemdeýge múmkindik beretinin málimdegen.
Derekkózdiń málimetinshe, AQSh bıligi jańa áýe tobynyń ornalasýyna qatysty birneshe nusqany qarastyryp jatyr. Olardyń qatarynda bir negizgi baza qurý nemese iri kommertsııalyq áýe kompanııalary úlgisimen birneshe áýejaıdan turatyn jeli qalyptastyrý bar.
Eske salaıyq, buǵan deıin AQSh-tyń Qazaqstandaǵy elshisi ımmıgratsııalyq vıza berýdiń ýaqytsha toqtatylýyn túsindirgen edi.
