AQSh vızasyna ótinish beretin taǵy 25 eldiń azamattaryna kepildik jarna engizildi

ASTANA. KAZINFORM – AQSh prezıdenti Donald Tramptyń ákimshiligi AQSh vızasyna ótinish bergen kezde azamattarynan 5 myńnan 15 myń dollarǵa deıin kepildik jarna tóleýdi talap etetin elder tizimine taǵy 25 memleketti qosty, dep habarlaıdy Anadoly. 

AQSh Memlekettik departamentiniń resmı saıtynda jarııalanǵan aqparatqa sáıkes, vızalyq ótinish berý kezinde kepildik jarna engizý talaby 21 qańtardan bastap kúshine enedi.

Jańa talapqa ilingen elder qataryna Aljır, Angola, Antıgýa jáne Barbýda, Bangladesh, Benın, Býrýndı, Kabo-Verde, Kot-d’Ivýar, Kýba, Djıbýtı, Domınıka, Fıdjı, Gabon, Qyrǵyzstan, Nepal, Nıgerııa, Senegal, Tájikstan, Togo, Tonga, Tývalý, Ýganda, Vanýatý, Venesýela jáne Zımbabve kirdi.

Atalǵan elderden ótinish berýshilerden 5 myńnan 15 myń dollarǵa deıin kepildik jarna talap etiledi. Jarna mólsheri vızalyq suhbattyń nátıjesine qaraı anyqtalady.

Vedomstvo kepildik jarnany tóleý vızanyń berilýine kepil bolmaıtynyn atap ótti. Sondaı-aq ýákiletti qyzmetkerdiń maquldaýynsyz jasalǵan tólemder qaıtarylmaıdy.

Osy sheshimdi eskere otyryp, kepildik jarna talap etiletin elderdiń jalpy sany 38-ge jetti.

Olardyń basym bóligi Afrıkada ornalasqan, al bir bóligi Latyn Amerıkasy men Azııa aımaqtaryna tıesili.

Sonymen qatar AQSh bıligi buǵan deıin 2025 jyldyń jeltoqsanynan bastap vızasyz kirý baǵdarlamasyna qatysatyn 42 eldiń týrısterine qatysty áleýmettik jelilerdegi derekterdi sońǵy bes jyl kóleminde taldaýdy josparlap otyrǵanyn habarlaǵan bolatyn. Bul elder qataryna Ulybrıtanııa, Frantsııa, Germanııa jáne Ońtústik Koreıa da kiredi.

Aıta ketelik Tramp ákimshiligi 85 000 vızanyń kúshin joıǵan edi.