AQSh vızasyna 15 000 dollar kepil tóleıtin elder tizimi 50-ge deıin kóbeıdi
ASTANA. KAZINFORM – AQSh Memlekettik departamenti 2 sáýirden bastap vızalyq kepil baǵdarlamasynyń keńeıtilgen nusqasy kúshine enetinin habarlady. Buǵan deıin qamtylǵan 38 elge taǵy 12 memleket qosyldy, dep habarlaıdy AQSh-tyń Memlekettik departamenti.
Jańa erejege sáıkes, atalǵan 50 eldiń azamattary týrıstik jáne iskerlik B1/B2 vızalaryna ótinish bergen kezde 15 000 dollarǵa deıin kepil jarnasyn tóleýi tıis.
Baǵdarlamaǵa jańadan engizilgen 12 el: Grýzııa, Mońǵolııa, Mavrıkıı, Kambodja, Efıopııa, Grenada, Lesoto, Mozambık, Nıkaragýa, Papýa — Jańa Gvıneıa, Seıshel araldary jáne Týnıs. Buǵan deıin baǵdarlama negizinen Afrıka elderin qamtyǵan 38 memleketti qamtyǵan, olardyń qatarynda Aljır, Bangladesh, Botsvana, Kýba, Nıgerııa, Zambııa jáne basqa elder bar.
Kepil jarnasy ótinish berýshige vıza berilmegen jaǵdaıda nemese ol AQSh-ta bolý talaptaryn tolyq saqtaǵan kezde qaıtarylady. Memlekettik departamenttiń málimetinshe, bul shara vızanyń merzimi aıaqtalǵannan keıin elde zańsyz qalyp qoıatyn sheteldikter sanyn azaıtýǵa baǵyttalǵan.
Donald Tramp ákimshiligi qatań ımmıgratsııalyq saıasat júrgizip keledi. Onyń aıasynda deportatsııalar, vızalar men grın-kartalardy joıý, sondaı-aq ımmıgranttardyń áleýmettik jelilerin tekserý sharalary júzege asyrylyp otyr.
Quqyq qorǵaýshylar bul baǵdarlamany azamattardyń quqyqtaryn shekteıdi dep synǵa alsa, bılik ókilderi ony ishki qaýipsizdikti qamtamasyz etýdiń tıimdi quraly dep sanaıdy.
Ótken jyldyń maýsym aıynda AQSh ulttyq qaýipsizdikke baılanysty 19 eldiń azamattaryna elge kirýge tyıym engizgen.
Elderdiń tolyq tizimin myna jerden kóre alasyz.
Buǵan deıin AQSh Ortalyq Azııanyń úsh eliniń azamattaryn da vızalyq kepil baǵdarlamasyna engizgeni habarlanǵan edi. Sonymen qatar AQSh H-1B beıımmıgratsııalyq jumys vızasyn alý úshin 100 myń dollar kóleminde alym, al «Tramptyń altyn kartasy» arqyly turaqty turýǵa ruqsat alý úshin 1 mıllıon dollar talap engizgen.
Sondaı-aq AQSh 100 myńnan astam vızanyń kúshin joıdy.