AQSh vızalyq shekteýleri Qytaı men Ortalyq Amerıka baılanysyna áser etpeıdi — QHR SІM

ASTANA. KAZINFORM — AQSh vızany qysym jasaý quraly retinde paıdalanǵanymen, bul sanaly adamdardy qorqyta almaıdy jáne Qytaı men Ortalyq Amerıka elderi arasyndaǵy qarym-qatynastyń damýyna tosqaýyl bola almaıdy, dep habarlaıdy Sınhýa.

Bul týraly seısenbi kúni Qytaı Halyq Respýblıkasynyń Syrtqy ister mınıstrliginiń resmı ókili Go Tszıakýn jýrnalısterge arnalǵan dástúrli brıfıng barysynda málimdedi.

Go Tszıakýn bul málimdemeni AQSh tarapynan Ortalyq Amerıka elderiniń azamattaryna jáne olardyń Qytaı Kommýnıstik partııasymen yntymaqtasyp, Ortalyq Amerıkadaǵy zań ústemdigin buzady dep aıyptalǵan jaqyn týystaryna qatysty engizilgen vızalyq shekteýlerge pikir bildirý kezinde aıtty.

Qytaı bul vızalyq shekteýlerge baılanysty AQSh-qa qatań narazylyq bildirgenin aıta kele, Go Tszıakýn Vashıngton «zań ústemdigi» degen jeleýmen zańsyz áreketter jasap, aımaq elderine qatysty saıası qysym men ekonomıkalyq májbúrleý quraldaryn qoldanatynyn atap ótti.

Onyń aıtýynsha, AQSh óz ulttyq zańnamasyn halyqaralyq quqyq pen halyqaralyq mindettemelerden joǵary qoıyp, basqa elderdiń zańdy quqyqtary men múddelerine nuqsan keltirip jatyr. Sonymen qatar memleketterdiń egemendik teńdigi men ishki isterine aralaspaý qaǵıdattaryn óreskel buzyp otyr, bul halyqaralyq tártipke eleýli zııan tıgizedi.

Go Tszıakýn Qytaı árqashan Ortalyq Amerıka elderiniń senimdi seriktesi ári dosy bolyp qala beretinin, olarmen birge damý men órkendeýge umtylatynyn jáne Qytaı men Latyn Amerıkasy arasyndaǵy ortaq taǵdyr qaýymdastyǵyn qurýǵa nıetti ekenin aıtty.

Eske salsaq, AQSh prezıdenti Donald Tramp 1 qarashadan bastap Qytaıdan keletin taýarlarǵa kedendik baj salyǵyn eki ese arttyrýdy jáne eksporttyq shekteýler engizýdi josparlap otyrǵanyn málimdedi.

Óz kezeginde Qytaı sırek jer metaldarynyń eksportyn baqylaýdy zańdy dep tanyp, AQSh-ty máselelerdi sóılesý arqyly sheshýge shaqyrdy.