AQSh vıtse-prezıdenti Úndistanǵa bardy

NЬıÝ-DELI. KAZINFORM — AQSh vıtse-prezıdenti Djeı Dı Vens Úndistanǵa resmı saparmen bardy, dep jazady TASS.

Delıde ol el premer-mınıstri Narendra Modımen kezdesip, ekijaqty saýda, kedendik baj salyǵy, qorǵanys salasyndaǵy yntymaqtastyq jáne geosaıası máselelerdi talqylaıdy.

Kelissózderdegi basty taqyryptardyń biri — ekijaqty saýda kelisimi. Bul qujat AQSh tarapynan Úndistanǵa engizilgen 26% kólemindegi kedendik baj salyǵynyń saldaryn jumsartýǵa baǵyttalǵan. 

Qazirgi tańda AQSh — Úndistannyń eń iri saýda seriktesi. 2024 jyly eki el arasyndaǵy saýda aınalymy 129 mlrd dollardy qurady. Onyń 45,7 mlrd dollary Úndistan paıdasyna oń saldo retinde tirkeldi.

The Economic Times basylymynyń jazýynsha, bul saparda naqty kelisimderge qol qoıylmasa da, taraptar bolashaqta qorǵanys jáne saýda baǵytynda aýqymdy seriktestiktiń negizin qalaıdy.

Aqpandaǵy Modı men Tramptyń kezdesýinen keıin jasandy ıntellekt, energetıka, jartylaı ótkizgishter, mańyzdy mıneraldar men qarý-jaraq óndirisi sekildi salalar boıynsha ortaq maqsattar belgilengen. Úndistan AQSh-tan Javelin tankke qarsy zymyrandaryn satyp alyp, Stryker áskerı tehnıkasyn birlesip óndirýi múmkin. 

Venspen birge onyń úndi tekti jubaıy Ýsha jáne úsh balasy da Úndistanǵa keldi. Delıde olardyń qaýipsizdigin qamtamasyz etý úshin polıtsııa kúsheıtilgen rejımde jumys istep jatyr. Delıge kele salysymen amerıkalyq delegatsııa áıgili Akshardham ǵıbadathanasyn aralap, dástúrli úndi qolóner buıymdary satylatyn saýda keshenin kórýi múmkin.

Vens pen Modı arasyndaǵy resmı kezdesý tústen keıin ótedi. Vens Delıden dúısenbi keshke ushyp, saparyn Djaıpýr men Agra qalalarynda jalǵastyrady.

Aıta keteıik, buǵan deıin Tramp Qarjy jáne Saýda mınıstrleriniń úgitteýlerinen keıin tarıfterdi ýaqytsha toqtatqanyn jazdyq.